Adam Lallana ġedded il-kuntratt ma’ Liverpool bi ftit xhur sa tmiem l-istaġun. Il-kuntratt tal-midfielder kien skedat li jintemm f’dan ix-xahar iżda minħabba l-pandemija tal-Covid-19, il-Premier League se jintemm wara Ġunju. B’hekk se jkun parti mill-iskwadra ta’ Liverpool li mistennija tikseb l-ewwel kampjonat tal-klabb wara 30 sena.
F’kumment lis-sit uffiċjali tal-klabb, Lallana qal li jinsab kuntent li għandu ċ-ċans li jispiċċa l-istaġun u ddeskriva dan il-mument bħala importanti ħafna għalih u l-familja tiegħu. “Issa mhux il-mument li niżen iż-żmien tiegħi hawn għaliex l-attenzjoni trid tkun fuq id-disa’ logħbiet li fadal u li l-klabb itemm l-istaġun bl-aħjar mod possibbli.
Lallana ngħaqad ma’ Liverpool mingħand Southampton fl-2014, dak iż-żmien taħt it-tmexxija ta’ Brendan Rodgers. Minn dakinhar lagħab 178 logħba u skorja 22 gowl. F’dan l-istaġun lagħab biss 15-il logħba fil-kampjonat u skorja gowl, b’ħafna mil-logħob li lagħab daħal bħala sostitut.
