L-aħbar tal-wasla tal-eks Ministru Konrad Mizzi f’Malta ħolqot interess kbir, u l-filmati mxandra minn Net News bl-ewwel kummenti ta’ Mizzi kienu rappurtati b’mod estensiv minn diversi kmamar tal-aħbarijiet.
Hawn taħt, nisiltu sitt punti ta’ interess u fatti minn dak li qalilna, kif ukoll xi ftit kurżitajiet li innutajna malli Konrad Mizzi deher ħiereġ mill-mitjar.
1. Se jibqa’ kwarantina
Dan ifisser li fadlilna ħafna biex narawh fil-Parlament.
Dan ifisser ukoll li fadal biex jaffaċja skrutinju fil-Kamra tad-Deputati.
U min naħa tal-Pulizija? Ħadd ma jaf jekk ġiex avviċinat fuq l-akkużi serji dwar flejjes kbar li intefqu mill-MTA fiż-żmien meta hu kien Ministru, il-bejgħ tal-isptarijiet u l-istejjer marbuta mal-Montenegro.
2. Mizzi qal li kellu flight twila
Ma’ Net News, Konrad Mizzi stqarr li kellu “long trip“
Id-domanda loġika li tiġi f’moħħ kulħadd hi: żgur kien ġej mir-Renju Unit? jew Londra kienet stop-over minn post ieħor?
3. Min kien ma’ Konrad Mizzi?
Dak li deher ma’ Mizzi hu imprenditur lokali, u wieħed jistaqsi jekk hux se jagħmel hu wkoll kwarantina.
4. In-nuċċali u l-maskra
Iva. Ankè Konrad Mizzi għandu din il-problema. Il-maskra u n-nuċċali ma tantx huma eżattament l-aqwa ‘partners’ f’dan iż-żmien tal-pandemija.
5. Imsiefer fuq xogħol
Okej, din interessanti. Jekk Konrad Mizzi kien imsiefer fuq xogħol. x’tip ta’ business mar jagħmel l-Ingilterra? Ma min iltaqa’? U meta eżatt ħassu ma jiflaħx?
Kemm kien ilu ma jiflaħx? U meta irrapporta b’dan kollu lill-Ispeaker Anglu Farrugia?
6. Jasal eżatt wara li ħareġ isem Angelo Gafà
It-Tnejn il-Gvern ħabbar li Angelo Gafà se jkun il-Kummissarju l-ġdid tal-Korp tal-Pulizija. U f’anqas minn 24 siegħa, tfaċċa Malta Konrad Mizzi. Kumbinazzjoni?
Id-deputat Nazzjonalista Jason Azzopardi allega fuq il-media soċjali li Konrad Mizzi kien qed jistenna garanzijja mill-Prim Ministru Robert Abela li l-Kummissarju l-ġdid ma kienx se jarrestah.
Lil min taqbad temmen? Nistennew u naraw.
INFAKKRU: Il-Partit Nazzjonalista mhux se jipparteċipa fis-smigħ li se jkollu Angelo Gafà quddiem il-Kumitat Parlamentari li jrid jikkonferma l-għażla ta’ Robert Abela.
