L-eks plejer ta’ Rabat Ajax, Valletta u Birkirkara Drasko Braunovic ħabbar fuq il-profil tiegħu fuq facebook li se jkun qed jirritorna ma’ Valletta fl-irwol ta’ Direttur Tekniku tal-klabb.
Braunovic kien diġà jinsab f’pajjiżna wara li f’Marzu nħatar bħala assistent kowċ ta’ Vladan Tomic. Iżda l-esperjenza tiegħu kienet qasira ferm hekk kif mexxew lit-tim għall-konfront kontra Sliema Wanderers biss, hekk kif il-kampjonat twaqqaf minħabba l-Covid-19.
Intant, il-leġġenda ta’ Valletta Gilbert Agius se jibqa’ mal-klabb fl-irwol ta’ assistent kowċ wara laqgħa li fiha ntlaħaq ftehim. Għal Agius kien hemm interess minn klabbs oħra iżda għażel li jibqa’ mal-Beltin biex iservi bħala assistent tal-kowċ Giovanni Tedesco. Agius serva bħala assistent kowċ taħt diversi kowċis ta’ Valletta fl-aħħar tmien snin.
