L-imprenditur Għawdxi Joseph Portelli wiegħed lill-partitarji Ħamruniżi li fi żmien tliet snin, il-klabb se jirritorna għar-rebħ tal-unuri. Waqt rally għall-partitarji fil-Victor Tedesco Stadium, Portelli rringrazzja lill-President Nunzio Antignani, li ddeskrivieh bħala persuna importanti li wasslitu biex jidħol għal dan il-proġett.
Għalkemm Portelli qal li ma jagħmilx mirakli, u li hemm ħafna xogħol xi jsir biex il-klabb iqum fuq saqajh, sostna li għandu f’moħħu proġett ambizzjuż li se jagħmel id-differenza. Portelli qal li baqa’ impressjonat bil-merħba li ngħata fil-Ħamrun, fost entużjażmu kbir minn folla ta’ partitarji li attendew bi ħġarhom.
Ħamrun Spartans spiċċaw f’nofs il-klassifika fl-istaġun li għadda, f’dak li kien ir-raba’ staġun tagħhom b’mod konsekuttiv fil-Kampjonat Premier. L-aħħar darba li Ħamrun rebħu l-kampjonat kien fl-istaġun 1990/91 filwaqt li l-aħħar darba li lagħbu f’kompetizzjoni Ewropea kien fl-istaġun 1992/93.
