Eks nutar li sentejn ilu kien ġie kundannat ħames snin ħabs wara li nstab ħati li ffroda diversi klijenti tiegħu kellu s-sentenza tiegħu mnaqqsa b’sena mill-Qorti tal-Appell.
L-Imħallef Consuelo Scerri Herrera xorta saibtu ħati li għamel dikjarazzjonijiet foloz u ta’ miżappropjazzjoni u li kiser id-doveri uffiċjali tiegħu bħala nutar u ordnatlu jħallas ukoll il-flus lura lil dawk li kien iffroda f’diversi każijiet.
Il-Qorti kkonfermat ukoll interdizzjoni perpetwa fil-konfrot tiegħu u l-konferma tat-telfien tal-warrant ta’ nutar. In-nuqqas ta’ sena mis-sentenza saret peress li sakemm ħarġu l-akkużi fil-konfront tiegħu u waqt il-kawżi huwa ħallas lil uħud minn dawk li ġew iffrodati. Huwa kellu jrodd lura mill-anqas €90,000.
L-eks nutar Pierre Falzon kellu jċedi l-warrant tiegħu ta’ nutar fl-2016 wara każ separat ta’ miżappropjazzjoni. F’sentenza ta’ 108 paġna tal-Qorti tal-Appella ssemmew diversi persuna li ġew migduma mill-eks nutar.
Każijiet li jinkludu trasferimenti ta’ flus ta’ klijenti fil-kont tal-mara tiegħu. Oħrajn li kienu ħallsuh eluf ta’ ewro f’ħlasijiet ta’ taxxi, suċċessjoni u miżati fuq propjetà u li skoprew snin wara li l-ħlasijiet tagħhom ma kienux saru min-nutar.
F’każ minnhom, depożitu ta’ €12,800 fuq propjetà kienġie depożitat fil-kont bankarju tal-mara ta’ Falzon f’Lulju tal-2010. Meta l-fondi kienu meħtieġa ċekk inħareġ kif suppost ma setax jissarraf għax ma kienx hemm fondi.
Il-Qorti sabet li minn dawn, kien hemm 17-il każ ta’ frodi li jinvolvu lill-eks nutar u li kienu qed jiġu investigati mill-Pulizija. F’investigazzjoni minnhom, il-Pulizija sabet li Pierre Falzon kien ukoll involut fl-iffalsifikar ta’ firem ta’ medjatur u Imħallef f’każ ta’ separazzjoni.
Madankollu dawn l-akkużi keinu twaqqgħu fl-ewwel Qorti li kienet qalet li setgħet biss tispekula dwar min kien l-awtur ta’ dawn il-firem foloz. Il-Qorti tal-Appell fis-sentenza tagħha qalet li kienet qed temfasizza li l-aġir tal-eks Nutar fejn qalet li kien wieħed deplorabbli u li ma jagħmilx ġieh lill- professjoni notarili.
“Numru kbir ta’ persuni bagħtew konsegwenzi serji riżultat tal-agir tiegħu. Huwa kien uffiċjal pubbliku meta kkometta r-reati in u li għalhekk persuna fdata mis-soċjetà fejn partijiet jagħżlu li fost oħrajn jħallu d-depożitu fuq konvenju man-Nutar minflokk ma jgħadduh lil venditur u dan peress li jkollhom ċertu fiduċja fin-Nutar.
“Ċertament li wieħed ma jistenniex li se jingidem mill-istess Nutar li suppost kellu jissalvagwarda l-interessi taż-żewġ partijiet bħal każijiet fejn meta jirċievi flejjes destinati sabiex per eżempju titżallas taxxa, u dan ma jsirx”
Il-Qorti kompliet tgħid li ċertament li l-agir tiegħu tefaż dell ikrah fuq il-professjoni notarili. Il-Qorti tal-Appell qalet li kienet qed tieħu konsiderazzjonoi tal-fatt li qabel ma nħargu l-akkużi u waqt il-proċeduri Pierre Falzon kien ħallas lura xi flejjes.
F’xi waqtiet ukoll gew anke reġistrati l-kuntratti u taxxa mhallsa minn naħa tiegħu u għalhekk dan għandu jittieħed kont għall-piena. Il-Qorti qalet li fil-każ ta’ frodi, il-piena stabbilita titnaqqas bi grad jew b’żewġ gradi, kemm-il darba l-ħati, qabel ma tibda titmexxa xi proċedura kriminali kontra tiegħu, jrodd għal kollox il-ħsara kkaġunata bir-reat.
Ghalhekk dan l-artikolu japplika ghal dawk l-akkużi fejn mill-atti rriżulta li rrifonda lura dak dovut qabel ma nbdew dawn il-proċeduri. Jirriżulta iżda li minkejja li dawn il-proċeduri ilhom għaddejin snin twal, il-ħati baqa ma ħallas lura dak kollu dovut. Il-Qorti f’dan il-kuntest ordnatlu biex iħallas lil persuni li baqghu ma thallsux.
//= $special ?>