Il-PN għandu viżjoni u missjoni għall-Maltin kollha, u dan kollu ġie kkonfermat permezz ta’ vot unanimu li adotta nhar il-Ħamis li għadda fejn ikkonferma r-riforma u t-tiġdid li qed juri biċ-ċar li l-PN qed ifittex li jxettel kultura favur il-Ġid Komuni.
Fl-aħħar jiem il-PN irċieva kwantità ta’ reazzjonijiet pożittivi għal din l-istqarrija li filwaqt li tikkonserva t-twemmin fondamentali li jispira l-partit, din ir-riforma għaddiet biex taġġornah u tiżviluppah fil-kuntest soċjali u kulturali li evolva fis-soċjetà Maltija fl-aħħar snin.
Permezz ta’ stqarrija l-PN qal li l-missjoni tiegħu hi li jkun partit tan-nies b’vokazzjoni li jservi l-interess tal-ġid komuni tal-poplu Malti u Għawdxi u li jaħdem b’risq id-dinjità umana.
Fid-dikjarazzjoni ċara li ġiet ikkonfermata l-Ħamis li għadda, il-partit qed u se jibqa’ jagħti l-ogħla prijorità lil-libertà, lid-demokrazija, l-ekwità, l-inklużjoni u l-ġustizzja soċjali fi Stat fejn tirrenja s-Saltna tad-Dritt.
Il-Partit itenni l-impenn ċar li jaħdem bis-sħiħ ma’ kull persuna, entità u mal-volontarjat fis-soċjetà li għandhom għal qalbhom il-ġid komuni tal-poplu Malti u tal-bnedmin.
Il-Kunsill Ġenerali ser ikompli l-Ħadd b’numru ta’ diskorsi minn numru ta’ kelliema u mistenni jagħlaq bid-diskorsi tas-Segretarju Ġenerali Francis Zammit Dimech u tal-Kap tal-Partit Adrian Delia. Is-sessjoni ser tkun trasmessa live fuq midja kollha tal-Partit inkluż Net TV.
Ara d-dettal fl-estratt hawn taħt ta’ Artikoli 1 u 2 tal-Statut ġdid tal-PN adottat unanimament il-Ħamis 25 ta’ Ġunju hawn taħt:
Statut PN 2020 – Estratt (Adottat unanimament mill-Kunsill Ġenerali PN, il-Ħamis 25 ta’ Ġunju 2020)Isem
1. (1) L-isem uffiċjali tal-partit huwa Partit Nazzjonalista. Il-Partit, imwaqqaf f’Malta u Għawdex, huwa membru tal-Partit Popolari Ewropew (PPE). (2) Il-Partit Nazzjonalista huwa partit tan-nies b’vokazzjoni li jservi l-interess tal-ġid komuni tal-poplu Malti u Għawdxi u li jaħdem b’risq id-dinjità umana.
Viżjoni u Missjoni
2. (1) L-għan ewlieni tal-Partit Nazzjonalista hu l-iżvilupp tan-nazzjon b’mod l-iktar sħiħ, ġust, demokratiku u sostenibbli għat-tgawdija ta’ kulħadd bil-ħarsien u t-twettiq tal-ġid komuni.
(2) Il-pern tal-missjoni tal-partit huwa l-benesseri ta’ kulħadd, f’rispett sħiħ għall-valur tal-ħajja umana, għad-dinjità inaljenabbli ta’ kull persuna umana u għall-jeddijiet tagħha fi fraternità ta’ bnedmin f’umanità waħda b’diversità ta’ kulturi.
(3) Il-partit jimpenja ruħu li jaħdem għat-titjib tal-kwalità tal-ħajja ta’ kull persuna msejsa fuq il-libertà, id-demokrazija, l-ekwità, l-inklużjoni u l-ġustizzja soċjali fi Stat fejn tirrenja s-Saltna tad-Dritt.
(4) Il-partit iħares lejn il-politika bħala l-ogħla sejħa u impenn għal servizz b’rieda tajba fl-interess tal-poplu u bħala għodda fejjieda u lajka fir-realtà tal-ħajja ta’ kuljum li jaffaċċjaw in-nies.
(5) Fil-ħidma tiegħu l-partit ifittex li l-Istat ikun il-qaddej ta’ niesu. Dan għandu jsir billi d-deċiżjonijiet jittieħdu b’mod trasparenti dejjem fl-eqreb livell tan-nies skont il-prinċipju tas-sussidjarjetà bis-sehem attiv ta’ kull ċittadin.
(6) Il-partit jemmen bis-sħiħ li f’dinja globalizzata s-solidarjetà hija t-tarka ewlenija biex ħadd ma jibqa’ lura fil-mixja tal-iżvilupp ekonomiku, soċjali u ambjentali u fis-servizzi li joffri l-Istat.
(7) Il-partit jibqa’ jgħasses biex għall-ġejjieni l-poplu jkompli jgawdi l-aqwa ġid. Għalhekk jispikka s-sehem ewlieni tiegħu fil-modernizzazzjoni ta’ pajjiżna. Il-kisbiet tal-Indipendenza u s-sħubija fl-Unjoni Ewropea huma fost il-kisbiet storici li sawruna f’nazzjon sovran, modern u Ewropew.
(8) Filwaqt li jħaddan soċjetà dejjem iżjed pluralistika u multi-kulturali, il-partit jemmen f’soċjetà inklussiva fejn tixxettel l-għaqda b’kultura ta’ djalogu fir-rispett tad-diversità ta’ fehmiet u twemmin, u fejn jopponi kull forma ta’ mibegħda u vjolenza.
(9) Il-partit iqis id-dinja bħala d-dar komuni tagħna u tal-ġenerazzjonijiet futuri. Għaldaqstant jagħraf li l-aqwa mezz biex iseddaq kwalità ta’ ħajja aħjar għal kulħadd hu li bi prijorità jħares u jippromwovi l-ambjent, ir-riżorsi naturali, il-beni komuni u l-ispazji pubbliċi. Il-partit iqis l-ambjent bħala parti essenzjali mill-wirt komuni tal-bniedem. F’dan kollu l-partit jagħti prijorità lit-tibdil fil-klima u dan jagħmlu b’kejl li jqis il-ġustizzja ambjentali u l-interessi tal-ġenerazzjonijiet futuri.
(10) Il-Partit iwettaq dawn il-prinċipji u jimpenja ruħu li jaħdem biex:
a) kulħadd jiżviluppa u jħares saħħtu, mill-konċepiment sal-aħħar nifs, bl-enfasi fuq il-kwalità tal-ħajja, f’familja mibnija fuq l-imħabba, mingħajr id-dellijiet ta’ faqar, diskriminazzjoni, abbuż u esklużjoni;
b) kulħadd, tul ħajtu, ikollu l-opportunità għall-edukazzjoni u li jiżviluppa l-ħiliet individwali tiegħu bl-għajnuna tal-aqwa tagħlim u appoġġ personalizzat, u li jipparteċipa bis-sħiħ fil-ħajja tal-familja, tax-xogħol u tas-soċjetà ċivili;
ċ) kulħadd jieħu sehem fl-iżvilupp ekonomiku li jkattar xogħol dinjituż imħallas b’mod ġust, u f’qafas ta’ istituzzjonijiet li jħarsu l-interessi tal-ħaddiema u l-impriżi, partikolarment dawk żgħar u medji, u li jippromwovu l-inizjattiva u l-imprenditorjalità b’investiment qawwi fil-faċilitajiet tar-riċerka, ix-xjenza, it-teknoloġija u l-innovazzjoni;
d) kulħadd jibbenefika mit-tkattir tal-faċilitajiet kulturali u jistagħna fl-għarfien u l-imħabba tal-wirt storiku, kulturali u tal-arti biex nibqgħu niġġeddu soċjalment bil-ħiliet kreattivi u artistiċi tal-poplu tagħna; u
e) il-ġenerazzjonijiet preżenti u futuri jkollhom Stat li jibqa’ jagħmel kemm jista’ biex iseħħu l-paċi u l-ġustizzja f’Malta, fl-Ewropa u fid-dinja, l-aktar fil-Mediterran fejn jiltaqgħu u jitħalltu ċiviltajiet differenti.
(11) Il-partit jimpenja ruħu li jimxi fuq dawn il-prinċipji fl-istess waqt li jfittex li jaħdem bis-sħiħ ma’ kull persuna, entità u mal-volontarjat fis-soċjetà li għandhom għal qalbhom il-ġid komuni tal-poplu Malti u tal-bnedmin.
