It-tiratur Brian Galea rebaħ ir-raba’ stadju tat-tournament tat-trap li ġie organizzat fix-Shooting Range Nazzjonali. Din kienet l-ewwel kompetizzjoni tal-Federazzjoni Maltija wara nuqqas ta’ 17-il ġimgħa.
Fil-fażi ta’ kwalifikazzjoni, Brian Galea kkwalifika l-ewwel b’49/50 segwit minn Emmanuel Bugeja b’48/50 u James Galea Jr. b’45/50. Biex ikunu deċiżi t-tiraturi l-oħra fil-finali kien hemm bżonn shoot-off bejn erba’ tiraturi wara li kollha spiċċaw b’44/50.
Nazzareno Attard u Nico Sciberras ikkwalifikaw fl-ewwel shoot-off u wara t-tielet shoot-off, kien Charles Grech li elimina lil Gianluca Chetcuti. B’kollox ġew reġistrati żewġ straights wara li Brian Galea u Emmanuel Bugeja laqtu l-25 plattina minn 25 plattina.
Inċidentalment, l-aħħar tliet tiraturi li kkwalifikaw kienu l-ewwel tliet tiraturi li ġew eliminati fil-fażi finali. Charles Grech laqat 15/25, Nico Sciberras temm il-ħames wara riżultat finali ta’ 21/30 u Nazzareno Attard ikklassifika fir-raba’ post hekk kif kien eliminat fit-tielet rawnd b’riżultat finali ta’ 27/35.
Minħabba li l-ewwel rawnd ma kienx tajjeb daqs il-kompetituri l-oħra, b’rawnd li laqat żewġ plattini minn ħamsa, James Galea Jr. naqas li jagħmilha għall-finali. Il-finali kienet ikkontestata bejn Brian Galea u Emmanuel Bugeja, b’tal-aħħar kellu vantaġġ ta’ plattina qabel il-finali. Iżda fl-aħħar għaxar plattini, Brian Galea laqat disgħa u Bugeja laqat sebgħa, b’Galea joħroġ rebbieħ b’vantaġġ ta’ plattina.
L-ewwel tliet tiraturi fil-klassijiet rispettivi tagħhom għalqu l-ewwel żewġ rawnds ta’ kwalifikazzjoni b’dawn ir-riżultati:
Klassi A: Brian Galea (49/50), Emmanuel Bugeja (48/50), James Galea Jr. (45/50)
Klassi B: Michael Grech (42/50), Noel Attard (41/50) (Countback Rule), Anġlu Ciappara (41/50)
Klassi Ċ: Joseph Cardona (42/50), Ryan Bugeja (41/50), Andrew Briffa (39/50)
Il-Programm tat-trap tal-Federazzjoni Maltija tal-Isparar ikompli s-Sibt u l-Ħadd li ġej fil-Qormi Clay Shooting Club bil-kompetizzjoni Ġorġ Bugeja Memorial Grand Prix.
