Malta Public Transport aġġornat il-protokolli tas-saħħa u sigurtà fuq tal-linja skont l-aħħar linji gwida maħruġa mill-awtoritajiet li daħlu fis-seħħ b’mod immedjat.
L-istruzzjonijiet il-ġodda irrivedew in-numru massimu ta’ persuni li jistgħu ikunu qed jivvjaġġaw fuq tal-linja fl-istess ħin u jippermettu wkoll numru limitat ta’ passiġġiera bil-wieqfa. Jiddependi mit-tul tal-vettura, il-karozzi tal-linja jistgħu jġorru massimu ta’ persuni bil-wieqfa li jvarja bejn 5 u 15 skont kif ikun indikat.
Il-klijenti se jsibu sinjali apposta li jiggwidawhom dwar x’għandhom jagħmlu u x-xufiera se jikkontrollaw in-numru ta’ persuni li jkunu jistgħu jitilgħu mill-waqfiet tal-linja. Il-ħlas eżatt se jibqa’ jiġi mitlub u x-xufiera mhux se jkunu jistgħu jagħtu bqija għal biljetti li jinxtraw bi flus kontanti. Intant, il-passiġġiera huma mħeġġa biex jużaw it-Tallinja Cards tagħhom fejn huwa possibbli biex jitnaqqas il-kuntatt fiżiku dirett.
Il-maskri għandhom jibqgħu jintlibsu matul il-vjaġġ kollu kif ukoll fuq il-waqfiet tal-linja. Hekk kif jitilgħu, il-passiġġiera huma mitluba jsibu post fuq wara biex iħallu spazju għal passiġġiera oħra u ma’ jagħlqux il-passaġġ.
L-arja kundizzjonata fuq tal-linja reġgħet bdiet tiffunzjona u sistemi interni u esterni fil-vetturi qed jibdlu l-arja li tkun qed tiċċirkola minimu ta’ tmien darbiet kull siegħa.
