Il-Kummissjoni Ewropea approvat l-użu tal-mediċina Remdesivir għall-pazjenti morda bil-Covid-19 fl-Istati-membri tal-Unjoni Ewropea.
Il-mediċina ‘anti-viral’ kienet oriġinarjament żviluppata bħala trattament għall-marda Ebola iżda l-aħħar studji sabu li d-dożi regolarizzati ta’ din il-mediċina kapaċi jnaqqsu ż-żmien li pazjent infettat bil-Covid-19 ( u li jirriżultawlu l-kumplikazzjonijiet) ikollu jqatta fl-isptar.
Ir-Remdesivir diġà ġiet approvata f’numru ta’ pajjiżi li jinkludu l-Istati Uniti. Iżda hemm anki element ta’ kontroversja wara li l-Istati Uniti ħabbret, jiem ilu, li kienet xtrat kważi l-ammonti kollha ta’ din il-mediċina mingħand il-produttur Amerikan Gilead, għat-tlett xhur li ġejjin.
Filwaqt li hemm ‘sinjali ċari’ li r-Remdesivir tista’ tkun ‘arma effettiva’ kontra l-virus, il-provi kliniċi f’diversi sptarijiet madwar id-dinja indikaw li s-sintomi tal-Covid-19 f’pazjent jistgħu jispiċċaw fi ħdax-il jum aktar milli fil-ħmistax-il ġurnata stabbiliti fl-istudji.
Minkejja l-lok għal ottimiżmu, l-esperti qegħdin iwissu li l-Remdesivir ‘mhix xi bakketta maġika’ li telimina t-theddida tal-Covid-19. Madankollu, il-mediċina għandha l-potenzjal li ssalva l-ħajja ta’ pazjenti partikularment vulnerabbli u aktar ma tkun effettiva, anqas ikun hemm il-pressjoni fuq l-isptarijiet.
