Gżira United komplew isaħħu l-iskwadra għall-istaġun li ġej hekk kif ħabbru l-akkwisti ta’ Gabriel Bohrer Mentz u Jackson Mendoza mingħand Santa Lucia. Iż-żewġ plejers kienu fost l-aqwa għat-tim ta’ Oliver Spiteri l-istaġun li għadda u dawn iż-żewġ plejers żgur se jkunu utli għall-pjanijiet tattiċi tal-kowċ Darren Abdilla.
Il-plejer Brażiljan ta’ 21 sena ffirma kuntratt ta’ sentejn mal-Gżirjani. Hu kien regolari fid-difiża ta’ Santa Lucia u b’eċċezzjoni ta’ logħba, lagħab il-logħbiet kollha fil-kampjonat qabel kellu jieqaf minħabba l-Covid-19.
Jekk Mentz kien regolari, daqstant ieħor kien Mendoza li l-istaġun li għadda kien il-captain ta’ Santa Lucia fl-ewwel staġun tagħhom fl-ogħla diviżjoni. Il-Kolombjan iffirma kuntratt ta’ sentejn. Gżira sa issa akkwistaw lil Steve Borg u Kevaughn Atkinson filwaqt li rritorna minn esperjenza fl-Emirati Għarab Magħquda Jefferson de Assis.
