James Camenzuli, dak li sa tliet ġimgħat ilu kien Direttur ta’ Projects Malta filwaqt li kien ħafna evażiv fit-tweġibiet tiegħu qal fil-Qorti li m’għandux aċċess għal dokumenti mportanti dwar dan il-każ minħabba li tliet ġimgħat ilu ma baqax jokkupa l-kariga li kellu.
Camenzuli, li kien qed jixhed fil-kawża li fetaħ biex il-poplu Malti jieħu lura l-isptarijiet tiegħu, nsista li dejjem kien jimxi mal-kumitat ta’ evalwazzjoni u aġġudikazzjoni, li hu kien membru tiegħu. Qal li dan il-mandat ma kienx jinkludi eżerċizzju ta’ diliġenza.
“Kif tista’ tivvaluta l-finanzi tal-bidders mingħajr ma tagħmel xogħol ta’ diliġenza dovuta?” Staqsa l-Avukat Edward Debono. B’Camenzuli jkompli jinsisti li l-kompitu tagħhom kien li kienu jivvalutaw l-offerti f’konformità mal-RFP (Sejħa għall-Proposti) u fil-fatt, iż-żewġ offerti l-oħra li saru ma kienux konformi u baqgħu biss Vitals fit-tellieqa.
“Kont għamilt verifiki fuq Tumuluri?” staqsa l-avukat. “Ma kinitx il-kompitu tagħna li nevalwaw il-persuni imma l-offerta,” kienet ir-risposta. “Kont taf dwar il-falliment tiegħu fil-Kanada lura fl-2012?” komplew id-domandi fejn il-Kap tal-Oppożizzjoni Adrian Delia kien ukoll fost il-protagonisti għal domandi persistenti li kienu qegħdin isiru, bix-xhud jibqa’ evażiv.
“Le. Wara sirt naf meta ġieli qrajt dwaru fil-gazzetti, bħalek u bħal kulħadd. L-ambitu tagħna kien li nsegwu b’mod strett il-iskeda mqiegħda minn Projects Malta.
“Din kienet ir-responsabbiltà tagħna u li nissodisfawha. Aħna ma wettaqna l-ebda investigazzjoni, għamilna biss evalwazzjoni, ” kompla jgħid ix-xhud. Mistoqsi jekk kien jaf minn qabel jekk kienx jaf minn qabel li Vitals kienet dik il-magħżula, huwa wieġeb – “Naħlef taħt ġurament li ma kontx.”
Fir-rigward tal-fatt li l-kumpanija kienet ġiet irreġistrata xahar qabel ma tlesta r-rapport ta ‘evalwazzjoni, Camenzuli qal li kien normali għal “konsorzju” li jingħaqdu ftit qabel ma jitfgħu offerta.
“Madankollu konsorzju ma kienx dak preferut. VGH biss kienet, ”irrimarkaw l-Avukati Debono u Delia. “Huma [VGH] kellhom l-appoġġ ta ‘kumpaniji kbar. Forsi l-konsorzju mhux it-terminu eżatt, ”wieġeb ix-xhud. Il-ka# ikompli l-Erbgħa 22 ta’ Settembru.
