Illejla l-Ħadd, fid-9:15pm fuq Net Television, se tixxandar l-aħħar edizzjoni ta’ Replay għal din l-iskeda. L-edizzjoni tal-lejla se tkun waħda speċjali għaliex se tkun dedikata lil Floriana, fl-okkażjoni tar-rebħ tas-26 Kampjonat fl-istorja tal-klabb. Replay tal-lejla se jerġa’ jirritorna fl-istudio ta’ Net Television, u bi preżentazzjoni ta’ Christian Micallef, flimkien mal-mistieden residenti tal-programm Konrad Sultana, il-mistiedna tal-lum se jkunu l-kowċ ta’ Floriana, Enzo Potenza kif ukoll il-plejers tal-Greens, Jurgen Pisani u Ryan Camenzuli.
Fil-programm tal-lejla, it-tim ta’ Replay, ħejja diversi servizzi interessanti li juru l-atmosfera li kien hemm ilbieraħ fil-Floriana, partikolarment fi Triq Sant Anna u l-Fosos. B’intervisti mal-plejers, membri tal-kumitat u partitarji ta’ Floriana, minn George Cassar, filmati ta’ Joe Sultana u muntaġġ ta’ Vanessa Mizzi, illejla t-telespettaturi se jkunu jistgħu ssegwu dak li kellhom xi jgħidu l-Furjaniżi waqt l-ewforija tagħhom fil-mument taċ-ċelebrazzjoni tar-rebħ tal-Kampjonat. F’Replay tal-lejla se tkunu tistgħu ssegwu ukoll il-gowls kollha ta’ Floriana matul l-istaġun li ntlagħab. Il-programm tal-lejla jixxandar fid-9:15pm fuq Net Television.
