Il-Fondazzjoni Puttinu Cares tibqa’ taħdem biex tgħin aktar u aktar persuni fi żmien meta jkunu għaddejjin minn sfidi kbar ta’ saħħa.
Net News iltaqa’ ma’ Rennie Zerafa, Kap Eżekuttiv ta’ Puttinu Cares, li tkellem magħna dwar proġett ġdid li permezz tiegħu il-fondazzjoni se tkun tista’ tgħin aħjar lil pazjenti li jkollhom bżonn kura f’Londra.
“Għandna grupp ta’ Maltin li sabulna s-sit u li qed jaħdmu fuq dan il-proġett biex meta l-pazjent imur Londra ma jmurx hu biss b’xejn imma anke l-familja tiegħu. Bħal ma għandna ta’ Sutton issa jkolna anke f’Londra”.
Puttinu Cares, li kienet imwaqqfa’ uffiċjalment fl-2002, oriġinarjament kienet issawret biex tgħin lil tfal bil-kanċer, imma minn dakinhar ‘l hawn wessgħet is-sostenn tagħha biex issa tgħin ukoll lil pazjenti b’kundizzjonijiet differenti u anke lil persuni adulti.
“Illum il-ġurnata jsiefru 60 – 90 persuna fix-xahar u mhux tfal biss, imma anke adulti, u b’kull tip ta’ kundizzjoni. Allura mingħajx ma nafu kbirna, u b’hekk ġejna bżonnu dal-proġett, għax indunajna li l-biċċa l-kbira qed imorru għall-kura Londra”.
Staqsejna lil Rennie xi proġetti għandhom pjanati għall-futur, fejn ħabbrilna b’mod esklussiv, il-proġett li jmiss.
“Oxford hemm Nufield Hopistal li hu sptar għall-kundizzjonijiet tal-għadam. Għada pitgħada meta nlestu l-proġetti li għadna, irridu nibdew ngħidnu wkoll lil min imur f’dawn l-inħawi”.
Iżda biex dan kollu jkun possibbli, Puttinu Cares għandha bżonn l-għajnuna tal-ħafna. Rennie jinsab konvint li din l-għajnuna se jibqa’ jsibha, għax il-poplu Malti,fejn jidħol mard dejjem issibu jagħti s-sostenn sħiħ tiegħu.
