Esperjenza oħra fil-Kampjonat Premier għal Edward Herrera hekk kif tħabbar uffiċjalment bħala plejer ta’ Żejtun Corinthians. Id-difensur ta’ 33 sena se jkun qed jagħti esperjenza lit-tim ta’ Orosco Anonam fl-ewwel avventura tagħhom fl-ogħla diviżjoni.
Prodott ta’ Melita, Herrera ngħaqad ma’ Pietà Hotspurs fis-sajf tal-2006 b’self u fis-sajf ta’ sentejn wara ngħaqad ma’ Hibernians b’self. Hu ngħaqad b’mod permanenti mal-Pawlisti fil-bidu tal-istaġun 2009/2010. Fis-sajf tal-2012, Edward Herrera ngħaqad ma’ Birkirkara, klabb li dam miegħu sitt snin u nofs. F’Jannar tas-sena l-oħra, il-plejer versatili kompla l-karriera ma’ Floriana qabel f’Jannar li għadda ngħaqad b’self ma’ Sirens. Fil-karriera tiegħu, Herrera rebaħ tliet darbiet il-kampjonat, darbtejn l-FA Trophy u darba s-Super Cup.
Żejtun sa issa akkwistaw lil Gianluca Bugeja, Anderson de Barros, Ricardo Faria u Kemar Reid. Filwaqt li kkonfermaw lil Orosco Anonam bħala kowċ, diversi plejers oħra qablu li jibqgħu mal-klabb.
