Eluf ta’ dimostranti rħewla fit-toroq tal-belt Russa ta’ Khabarovsk, fil-lvant tal-pajjiż mal-fruntiera maċ-Ċina, biex jipprotestaw kontra l-arrest tal-Gvernatur popolari tar-reġjun, Sergei Furgal.
Dan wara li nżamm arrestat fuq suspett t’omiċidju biex il-ġimgħa l-oħra kien estradit lejn il-kapitali Russa, Moska.
Dan sabiex jinżamm f’detenzjoni qabel ġuri li se jgħaddi fejn jaf jaffaċċja sentenza t’ għomru l-ħabs fuq akkużi t’involviment fil-kummissjoni ta’ numru t’assissinji ta’ negozjanti 15-il sena ilu.
Furgal, li ċaħad l-akkużi miġjuba kontrieh, kien il-Gvernatur li rebaħ bil-kbir kontra r-rivali tiegħu mill-Partit tal-Unjoni Russa, li jappoġġjaw lill-President Russu, Vladimir Putin.
Id-dimostranti ħonqu t-toroq tal-belt 3 ġimgħat biss wara r-rebħa ta’ Putin f’referendum b’emendi fil-kostituzzjoni li jistgħu jarawh imexxi l-Kremlin għal 16-il sena oħra.
Huma talbu għall-ħelsien mill-arrest ta’ Furgal u sabiex jaffaċċja ġuri trasparenti u imparzjali kontrih fir-reġjun tiegħu stess fejn kien elett.
