Stewart Said
Il-mira ta’ Valletta United hi ċara, dik li jirritornaw fil-Kampjonat Premier. Wara l-istaġun diżappuntanti tas-sena l-oħra, il-kumitat tal-klabb Belti ħadem biex isaħħaħ l-iskwadra u akkwista lil tliet plejers li ma għandhomx bżonn introduzzjoni fil-waterpolo lokali; Niki Lanzon, Michele Stellini u Edward Aquilina, plejers li għalkemm huma veterani se jkunu qed jagħtu dimensjoni differenti lit-tim.
Għal dan l-istaġun, it-tim se jkun immexxi minn Srdjan Lazarevic fl-ewwel esperjenza tiegħu f’pajjiżna. Hu se jkun assistit minn Stephen Rizzo. Lazarevic ilu f’pajjiżna minn Jannar u għalhekk seta’ jaħdem mat-tim filwaqt li jsegwi l-partiti lokali. Il-kowċ Montenegrin qal li l-ambizzjoni hi li jkunu kompetittivi ma’ kulħadd u stieden lill-partitarji biex jirritornaw fil-Pixxina. Valletta ma ħadux sehem fl-Enemed Cup u minħabba li l-Kampjonat tax-Xitwa ma ntlagħbx minħabba l-Covid-19. Dan il-fatt wassal biex Valletta kienu limitati biss għall-partiti ta’ ħbiberija.
Valletta jinsabu fi Grupp B tar-Rawnd Preliminari flimkien ma’ Sliema, San Ġiljan, Exiles u Otters. Il-Beltin jiftħu l-impenji għada kontra San Ġiljan, il-Ġimgħa li ġej kontra Otters, il-Ġimgħa 31 ta’ Lulju kontra Sliema u l-konfront mistenni kontra Exiles fit-8 ta’ Awwissu.
Is-sħubija ma’ IZIBET u l-approvazzjoni tal-proġett tal-pitch
Għal dan l-istaġun kif ukoll għall-Kampjonat tax-Xitwa li ġej, Valletta laħqu ftehim mal-kumpanija IZIBET biex ikunu l-isponsors uffiċjali tagħhom. Id-Direttur tal-Operat tal-kumpanija Sergio Cappitta rringrazzja lill-klabb tal-ħidma tiegħu fl-aħħar snin u qal li din is-sħubija hi parti integrali mill-ħsieb ta’ IZIBET li jagħtu sapport lill-isport lokali.
Is-Segretarju tal-klabb Jean Carl Farrugia qal li l-kumitat ilu jaħdem kif spiċċa l-istaġun li għadda. Hu semma kif wara ħafna snin u diffikultajiet, irċevew l-aħbar li l-permessi tal-iżvilupp għall-proġett tal-pitch ġie approvat. Il-ħsieb hu li x-xogħlijiet jibdew f’Ottubru li ġej b’tama li l-pixxina waħedha tkun lesta sas-sajf li ġej.
Valletta ilhom ma jirbħu l-kampjonat mill-1990 u għalhekk jeżisti distakk bejn l-aħħar snin glorjużi tal-klabb u l-preżent. Farrugia qal li r-rebħ iġib l-attenzjoni u kompla li l-klabb qed jagħmel l-ewwel pass li joħloq kuntatt mal-komunità bl-għan li aktar nies jersqu lejn il-Pixxina biex jagħtu s-sapport. Sergio Cappitta qal li s-sapport fil-klabb f’attivitajiet soċjali u ħsieb li bħala kumpanija qed jaħdmu fuqu biex jagħtu s-sapport lill-klabb b’mod differenti.
