Is-sewwieq tat-taxi Melvin Theuma iddaħħal b’urġenza l-isptar wara li ġarrab ġrieħi serji f’każ li żviluppa tard illejla fis-Swieqi, bil-Pulizija tgħid li l-ewwel indikazzjonijiet juru li Theuma – il-middleman fil-każ tal-assassinju ta’ Daphne Caruana Galizia – “weġġa’ lilu nnifsu”. Għalkemm dan is-sit irċieva wkoll rapporti konflinġenti li jikkontradixxu dak li intqal mid-Depot, fi stqarrija li ħarġet ftit tal-minuti biss wara li Theuma ttieħed mill-post.
Skont din l-istqarrija uffiċjali maħruġa mill-Korp, intqal illi meta l-avukat ta’ Melvin Theuma ma setgħetx tistabbilixxi kuntatt mal-middleman inġibdet l-attenzjoni tal-Pulizija mill-istess avukat.
Immedjatament, il-Pulizija li tkun għassa fuq barra tal-appartament ta’ Melvin Theuma il-ħin kollu, daħlet fuq ġewwa flimkien ma’ martu, u hawn sabu lill-middleman isofri minn ġrieħi. Minnufih intalbet għajnuna medika.
Net News jista’ jikkonferma li Theuma ttieħed mir-residenza tiegħu b’ambulanza, mitluf minn sensih. L-ambulanza kienet skortata mill-Pulizija sal-isptar Mater Dei.
Sorsi minn Mater Dei qed jindikaw li Theuma ddaħħal fit-teatru tal-operazzjonijiet għall-ħabta tal-11pm. Il-vittma għandu feriti kemm f’għonqu kif ukoll f’żaqqu.
Dwar il-każ infetħet inkjesta immexija mill-Maġistrat Astrid Grima.
Il-Pulizija f’dan l-istadju mhi qed teskludi xejn.
L-Erbgħa tkompli l-kumpilazzjoni ta’ Yorgen Fenech
Dan l-iżvilupp inkwetanti seħħ eżatt lejliet li se tkompli l-kumpilazzjoni tal-imprenditur Yorgen Fenech, li bħal Theuma allegatament kien involut fil-qtil ta’ Caruana Galizia.
Fis-smigħ tal-Erbgħa kellha tiġi preżentata il-proklama li kienet ingħatat f’Novembru li għadda lil Melvin Theuma.
Aktar kmieni
Tard illejla għall-ħabta tal-10pm, numru kbir ta’ Pulizija issejħu qrib ir-residenza fejn jgħix Melvin Theuma. Fil-post waslet ukoll ambulanza li ħadet persuna l-isptar b’urġenza.
Ir-raġel ittieħed mitluf minn sensih, f’ambulanza li kienet skortata mill-Pulizija.
Net News jista’ jikkonferma li ftit tal-ħin ilu waslu wkoll l-Ispetturi Keith Arnaud u Kurt Zahra.
Sorsi fil-post qed jgħidu li fil-blokka ta’ appartementi fejn seħħ il-każ, ħadd mhu jitħalla jidħol.
Fit-triq hemm preżenza kbira ta’ RIU u Pulizija tad-Distrett, flimkien ma’ membri tas-CID.
Melvin Theuma hu l-middleman u wieħed mill-persuni kompliċi fl-assassinju tal-ġurnalista Daphne Caruana Galizia. Hu kien ingħata l-maħfra presidenzjali f’Novembru li għadda mill-Kabinett tal-eks Prim Ministru Joseph Muscat sabiex jikxef l-informazzjoni kollha.
//= $special ?>