L-eks manager ta’ Arsenal Unai Emery inħatar kowċ ta’ Villarreal b’kuntratt ta’ tliet snin. L-Ispanjol ilu mingħajr klabb minn Novembru li għadda wara li tkeċċa minn manager tat-tim minn Londra.
Villarreal kienu taħt it-tmexxija ta’ Javier Calleja li ħalla l-klabb il-ġimgħa l-oħra wara li mexxiehom sal-ħames post fil-kampjonat La Liga, pożizzjoni li tfisser kwalifikazzjoni għall-Europa League tal-istaġun li ġej.
Bejn l-2008 u l-2012, Emery mexxa lil Valencia li huma r-rivali ta’ Villarreal. Dan minbarra esperjenzi ma’ Sevilla, Paris Saint-Germain u Spartak Moscow. Fil-karriera tiegħu jispikka s-suċċess ma’ Sevilla bir-rebħ tal-Europa League għal tliet staġuni konsekuttivi.
