Dejan Lovren jidher jinsab viċin li jingħaqad ma’ Zenit St. Petersburg mingħand Liverpool għal madwar €12-il miljun. Lovren ilu ma’ Liverpool mis-sajf tal-2014 wara li kien ingħaqad magħhom mingħand Southampton.
Speċjalment minn meta Virgil van Dijk issieħeb ma’ Liverpool f’Jannar tal-2018, Lovren ma tantx kien regolari fit-tim speċjalment minħabba l-kompetizzjoni ta’ Joe Gomez u Joel Matip. F’dan l-istaġun lagħab biss 15-il logħba fil-kompetizzjonijiet kollha.
Jidher li Liverpool huma lesti li jħallu lil Lovren jitlaq. Hu fadallu sena kuntratt maċ-champions Ingliżi iżda Liverpool għandhom l-għażla li jġeddu l-kuntratt għal staġun ieħor jekk jibqa’ mal-klabb fi tmiem is-suq tat-trasferimenti tas-sajf.
