Shaun Galea u Danica Bonello Spiteri rebħu l-kategoriji tal-irġiel u n-nisa rispettivament fl-ewwel tellieqa tal-Go & Fun fis-Sprint Triathlon Series. Total ta’ 90 triatleta ħadu sehem fl-ewwel tellieqa organizzata minn Birkirkara St. Joseph li saret il-Ħadd li għadda fis-Salini. Minħabba li l-Covid-19 ikkanċella l-maġġoranza tat-tlielaq internazzjonali kif ukoll poġġiet f’dubju l-istaġun tat-triathlon, il-parteċipazzjoni kienet pożittiva u l-entużjażmu beda jinħass.
Il-parteċipanti bdew b’għawma ta’ 750 metru. Bernard Sant ħareġ mill-ilma l-ewwel segwit miċ-champion nazzjonali Shaun Galea. It-taqsima tar-rota kienet tikkonsisti f’dawra ta’ 20 kilometru. Josef Bonavia rnexxielu jirreġistra l-aktar ħin veloċi biex naqqas id-distakk minn ma’ Sant u Galea. Kif beda l-aħħar taqsima tat-tellieqa, Bonavia żamm postu mal-ewwel tlieta, iżda temm fit-tielet post wara Shaun Galea u Bernard Sant.
Fil-kategorija tan-nisa, Hannah Cutajar ħarġet mill-ilma, b’Danica Bonello Spiteri ssegwi ftit sekondi warajha. Bonello Spiteri rnexxielha taqbeż lil Cutajar fit-taqsima tar-roti, liema stadju kien determinanti biex kisbet ir-rebħa. Dan hekk kif fl-aħħar fażi żammew l-ewwel post biex ħarġet rebbieħa. Dan kien ritorn għal Danica Bonello Spiteri fuq il-podju wara waqfa minħabba t-twelid tat-tarbija s-sena l-oħra. Cutajar li rreġistrat l-aħjar ħin fit-taqsima tal-ġiri, spiċċat fit-tieni post u warajhom daħlet iċ-champion nazzjonali Lara Buttigieg.
Is-Segretarju Ġenerali ta’ Birkirkara St. Joseph Sports Club Euchar Camilleri qal li “l-atmosfera li kien hemm is-Salina l-Ħadd filgħodu kellha tkun esperjenzata sabiex wieħed jifhem verament l-entużjażmu. Il-parteċipazzjoni kienet waħda mill-ikbar li l-klabb kellu fi ftit żmien u turi kemm it-triatleti Maltin kienu ilhom jistennew biex itellqu.”
Fit-tellieqa tal-Ħadd kien hemm nmru ta’ triatleti żgħażagħ li bdew il-karriera tat-triathlon mal-Malta Youth Triathlon Academy. L-Akkademja taħdem fil-qrib mal-klabb li jgħin fl-organizzazzjoni tat-tlielaq taż-żgħażagħ matul l-istaġun kollu. It-tellieqa li jmiss minn din is-serje ssir il-Ħadd li ġej fi Triq il-Kosta fil-limiti tas-Salini.
Riżultati
Kategorija tal-irġiel: 1. Shaun Galea (1:02.54), 2. Bernard Sant (1:03.25), 3. Josef Bonavia (1:03.36)
Kategorija tan-nisa: 1. Danica Bonello Spiteri (1:06.38), 2. Hannah Cutajar (1:07.48), 3. Lara Buttigieg (1:11.05)
