L-awtoritajiet Franċiżi, permezz ta’ azzjoni koordinata, evakwaw mal-1,500 persuna minn kamp enormi għall-immigranti viċin ix-xatt tal-Kanal ta’ Saint-Denis, f’Aubervilliers, lejn in-naħa ta’ fuq ( fil-limiti) ta’ Pariġi.
L-azzjoni saret bħala parti mill-pjan tal-Gvern Franċiż biex jevita sitwazzjoni fejn jittellgħu numru ta’ kampijiet ġodda ‘f’daqqa’ għall-immigranti fl-inħawi ta’ Pariġi, inkella qalb is-sobborgi lejn in-naħa ta’ ġewwa tal-kapitali.
Fl-aħħar sigħat, numru minn dawn l-immigranti ttellgħu fuq ix-xarabanks li ħaduhom lejn xelters u lokalitajiet oħrajn – bil-ħidma ssir taħt is-superviżjoni tal-Kap tal-Pulizija Didier Lallement.
L-iżgumbrar tal-immigranti ngħata urġenza mill-awtoritajiet fir-reġjun ta’ Pariġi wara li f’xahar wieħed biss, l-ammont tal-immigranti fil-kamp ‘ta’ Aubervilliers’ tela’ minn xi 400 f’nofs Ġunju għal ħafna aktar minn 1,000 sa nofs-Lulju. Dan meta mistenni li jaslu aktar immigranti fl-istess zona tal-kapitali fis-sigħat u l-ġranet li ġejjin.
