Raġel li allegatament ipprova jimporta l-isplussivi militari C-4, li kien xtara minn fuq sit tal-internet moħbija, ngħata l-ħelsien mill-arrest wara erba’ xhur taħt arrest preventiv.
Jomic Calleja Maatouk, ta’ 34 sena, minn Ħaż-Żebbuġ inħeles mill-arrest fuq depożitu ta’ € 5,000 u garanzija personali ta’ € 45,000, filwaqt li ġie ordnat ukoll jiffirma kuljum f’Għassa tal-Pulizija u josserva ‘curfew’.
Calleja Maatouk qed jiġi akkużat li pprova jimporta splussiv C-4 u polonju radjuattiv f’Marzu ta’ din is-sena. Fis-seduti preċedenti, il-Maġistrat Donatella Frendo Dimech kienet semgħet kif il-Pulizija kienet infurmata minn aġenziji f’Ġunju tal-2019 li xi ħadd minn Malta kien qed jipprova jixtri Polonium 210, Ricin u Fentanyl minn fuq sit mhux identifikabbli.
Komunikazzjonijiet li ġew interċettati bejn l-1 u t-8 ta’ Ġunju ta’ dik is-sena wrew li l-mira maħsuba ta’ Calleja kienet fuq raġel, li huwa twil bejn 165cm u 175cm u li jiżen bejn 55-60kg.
Dawn id-dettalji ġew żvelati hekk kif ix-xerrej, kien jużaż psewdonimi li jinkludu kliem bħal “893 utent mhux magħruf” 2F108X’2 u Foxtrot108XRAY” u kien mistoqsi mill-bejjiegħ liema doża ta’ polonju 210 kien jeħtieġ.
Polonium 210 hija sustanza radjuattiva li ma tagħmilx ħsara barra l-ġisem iżda letali jekk jinbelgħu, u tikkawża mewt minħabba mard li jiġi bir-radjazzjoni. L-istess sustanza ntużat biex toqtol lir-Russu maħrub u l-ex aġent tal-FSB Alexander Litvinienko fl-2006.
Calleja allegatament kien ġab l-oġġetti mir-Renju Unit u l-Pulizija kienet interċettat il-pakkett f’Malta.Is-Supretendent George Cremona u l-Ispettur Omar Zammit qegħdin imexxu l-Prosekuzzjoni. L-Avukat Benjamin Valenzia qed jidher għall-akkużat.
