Ir-ritorn lura fid-dinja tal-kapsula Dragon Endeavour – wara l-ewwel missjoni kummerċjali bl-involviment ta’ ekwipaġġ lejn l-Istazzjon tal-Ispazju Internazzjonali — qed jitqies bħala l-bidu ta’ era ġdida għall-aġenzija spazjali NASA tal-Istati Uniti.
Il-proċedura li ntużat għall-missjoni – bis-sehem ta’ entitajiet li jipprovdu servizz partikulari f’dan is-settur speċjalizzat – għandha tiffranka l-biljuni ta’ dollari lin-NASA, li, imbagħad, jistgħu jkunu investiti f’missjonijiet biex itellgħu l-astronawtu fuq il-qamar ( bħala parti mill-programm Artemis tal-istess NASA) u, eventwalment, fuq il-Pjanet Mars.
Il-kapsula kienet bdiet il-missjoni lejn l-Istazzjon Spazjali fl-aħħar ta’ Mejju — permezz ta’ rokit tat-tip Falcon 9 li supplixxietu l-kumpannija SpaceX, tal-imprenditur biljunarju Elon Musk, u li hi sieħba kummerċjali tan-NASA.
Il-missjoni saret ukoll bis-sehem kruċjali tal-astronawti Amerikani Doug Hurley u Bob Behnken li fl-aħħar sigħat ikkonkludew il-proċess ta’ ‘splashdown’ ( wara li rritornaw lura fid-dinja) fil-Golf tal-Messiku ‘il hinn mill-kosta ta’ Pensacola, fl-Istat Amerikan ta’ Florida.
Fil-fatt, il-missjoni rnexxiet bħala dimostrazzjoni ta’ ‘taxi service’ għall-astronawti u li l-kumpanija SpaceX, ‘il quddiem, se tkun qed tbiegħ lin-NASA.
It-touchdown fl-ibħra ‘il hinn minn Florida kien anki l-ewwel inżul ta’ dan it-tip li jinvolvi astronawti Amerikani mill-aħħar missjoni tal-vettura spazjali (tal-Istati Uniti) ‘Apollo’, li kienet tmur lura għas-snin sebgħin.
