Il-Kunsill il-ġdid tal-Kamra tal-Avukati li għadu kemm inħatar, iltaqa’ għall-ewwel darba fejn matulu, il-Kummissarju Elettorali Dr Philip Manduca, ippreżenta r-rapport tiegħu bid-dettalji tar-riżultati tal-elezzjoni li saret il-ġimgħa li għaddiet.
Fi stqarrija huma qalu li Dr Manduca stieden lill-Kunsill sabiex jinnomina membru sabiex dan jokkupa l-kariga ta’ President tal-Kamra għat-terminu li jmiss. Dr Louis de Gabriele kien nominat u approvat b’mod unanimu għal dan ir-rwol u se jkun qed iservi għal tlett snin, sal-2023.
Il-President il-ġdid kompla billi ppropona membri għal rwolijiet speċifiċi fi ħdan l-istess Kunsill li wara li kienu diskussi, kienu wkoll approvati b’mod unanimu.
Il-membri tal-Kunsill il-ġdid għalhekk se jkunu qed jokkupaw ir-rwoli kif imiss:-
Dr Louis de Gabriele – President
Dr Stephen Tonna Lowell – Viċi President
Dr Stefan Camilleri – Segretarju Ġenerali
Dr Peter Fenech – Uffiċjal Finanzjarju
Dr Anna Mifsud Bonnici – Uffiċjal għar-Relazzjonijiet Esterni
Dr Karl Briffa – Uffiċjal dwar l-Etika
Dr Matthew Brincat – Uffiċjal għall-Akkademija / Edukazzjoni
Dr Jesmond Manicaro – Chairman tal-Kumitat ta’ l-Awditjar
Dr Edward Gatt – Membru
Dr Timothy Bartolo – Membru
Il-President Louis de Gabriele laqa’ l-mod kif il-Kunsill il-ġdid huwa kompost, għaliex jikkonsisti f’taħlita ta’ membri differenti, uħud li diġa kienu fuq il-Kunsill u oħrajn li telgħu għall-ewwel darba. Dan mhux biss għandu jwassal għal kontinwità iżda wkoll ideat ġodda sabiex ikunu diskussi fil-Kunsill.
//= $special ?>