Il-Gvern tal-Messiku ħabbar li t-total tal-imwiet mill-infezzjonijiet tal-coronavirus (Covid-19) fil-pajjiż kienu qabżu l-50,000. L-aħħar ċifri mill-Belt tal-Messiku tħabbru jiem biss wara li l-Messiku sar il-pajjiż bit-tielet l-akbar numru ta’ każi fatali ( bil-Covid-19) fid-dinja. Huma biss l-Istati Uniti u l-Brażil li rreġistraw numri aktar traġiċi ta’ vittmi minn din il-marda.
Fl-aħħar sigħat, il-Ministeru tas-Saħħa fil-Messiku ħabbar 820 mewta oħra fl-aġġornament għall-‘aħħar 24 siegħa’. L-aġġornament ifisser li l-mejtin mill-coronavirus fil-pajjiż Latin Amerikan telgħu għal 50,517 mindu nstab l-ewwel każ ta’ infezzjoni matul ix-xahar ta’ Frar. Il-każi pożittivi (reġistrati) tal-Covid-19 fil-Messiku issa qabżu l-462,600 qalb il-poplu ta’ aktar minn 128 miljuni.
Dan meta l-poplu Messikan jinsab ferm preokkupat ‘għall-preżent u l-futur’ – bl-ammonti tal-vittmi mill-Covid-19 fil-Messiku jaqbżu l-pronostiku ‘ta’ bejn 6,000 u t-30,000 ‘ li kien ħareġ bih il-President Messikan, Manuel Lopez Obrador lejn l-aħħar ta’ Frar.
Il-Gvern ta’ Obrador, li f’Ġunju beda jnaqqas il-miżuri tal-lockdown fil-Messiku, bħalissa jinsab taħt skrutinju għal kif irreaġġixxa għall-coronavirus.
//= $special ?>