Il-Professur mediku Gianni Nanni wissa li jekk il-każijiet tal-coronavirus fil-futbol ikomplu jiżdiedu, hemm possibilità li s-Serie A tibda iżjed tard mid-data skedata. Dan wara li diversi plejers instabu pożittivi wara l-btala tagħhom, fosthom erba’ plejers ta’ Cagliari, Mirante ta’ Roma kif ukoll it-tim promoss ta’ Benevento.
Il-protokol mediku meta kien reġa beda l-futbol lura f’Ġunju li għadda kien wieħed effettiv ħafna, fejn ma nstab l-ebda każ tul il-logħob kollha sakemm intemm l-istaġun. Però, diversi plejers u membri tat-timijiet qiegħdin jirritornaw mill-vaganzi u hemm possibilità li jinstabu izjed każijiet il-quddiem. Dan ifisser li diversi klabbs ikunu sfurzati li jipposponu t-taħriġ, bir-rimedju li l-kampjonat ikun ittardjat. Filfatt, Cagliari diġa kellhom jipposponu t-taħriġ wara li sabu erba’ plejers pożittivi.
Il-Prof. Nanni ħeġġeġ lil plejers biex joqgħodu attenti, jkunu bilgħaqal u jobdu r-regoli u r-restrizzjonijiet.
L-istaġun Taljan tal-2020-2021 mistenni jibda fid-19 ta’ Settembru.
Dan ġara wkoll kemm fi Spanja kif ukoll fi Franża, fejn sabu plejers pożittivi fl-iskwadra tagħhom jiem biss qabel ma jibda l-kampjonat.
