Illejla tintemm l-iktar kompetizzjoni prestiġġjuża fl-Ewropa, fejn Bayern Munich se jilgħabu kontra Paris Saint-Germain biex xi ħadd minnhom jerfa’ t-trofej tal-UEFA Champions League. Il-partita se tintlgħab ġewwa Estadio da Luz fil-Portugall bil-bibien magħluqa, u tibda fid-21.00.
Dawn iż-żewġ timijiet iltaqgħu tmien darbiet u kollha waqt l-istadju tal-gruppi f’dan it-turnament. It-tim Franċiż rebaħ ħames partiti filwaqt li l-Ġermaniżi rebħu t-tlieta l-oħra fosthom l-iktar waħda riċenti f’Diċembru tal-2017.
Din hija l-ewwel finali għal PSG fl-istorja tal-klabb, li tagħmilhom il-41 tim li wasal sa din il-finali. L-aħħar sitt timijiet li kkompetew fil-finali għall-ewwel darba tilfu kollha, bl-aħħar tim li rebaħ kienu il-Borussia Dortmund kontra Juventus fl-1997.
PSG lagħbu żewġ finali biss f’kompetizzjonijiet Ewropej, fejn rebħu l-Winners Cup tal-1996 kontra SK Rapid Wien u tilfu tas-sena ta’ wara kontra Barcelona, biż-żewġ riżultati jintemmu 1-0.
Din is-sena, PSG rebħu l-grupp rispettiv tagħhom fejn għelbu l-qawwa ta’ Real Madrid, sabiex għaddew għall-aħħar sittax, fejn rebħu lil Borrusia Dortmund, Atalanta u RB Leipzig. Huma kellhom telfa waħda biss tul il-kompetizzjoni kontra Dortmund fl-aħħar sittax, fejn tilfu l-ewwel leg barra minn darhom 2-1.
Għal Bayern Munich, din hija l-11-il finali, t-tieni l-iktar tim li wasal sa’ dan l-istadju b’Real Madrid biss jinsabu qabilhom b’16-il darba. Il-Ġermaniżi rebħu dan it-titlu ħames darbiet, wara Liverpool b’sitt titli, Milan b’seba’ u Real Madrid b’tlettax-il trofej.
Bayern Munich fiċ-Champions League ta’ din is-sena għadhom ma tilfux logħba waħda. Huma rebħu kull logħba fil-fażi tal-gruppi, u komplew fl-aħħar sittax fejn għelbu lil Chelsea, Barcelona u Lyon.
Bayern Munich jistgħu jiksru r-rekord tal-iktar tim li skurja gowls f’staġun wieħed tal-kompetizzjoni. Dan għaliex huma s’issa skurjaw 42 gowl f’għaxar logħbiet, b’Barcelona biss kienu skurjaw iżjed fl-2000 meta kellhom 45 gowl f’16-il partita. L-iktar plejer li skurja dis-sena huwa Robert Lewandowski bi 15-il gowl.
