Hekk kif il-President ta’ Malta, George Vella ħabbar li L-Istrina se tkun qed issir fuq żewġ perjodi matul din is-sena, Bjorn Formosa appella biex id-data l-ġdida ta’ din l-inizzjattiva titmexxa hekk kif saret ġimgħa biss qabel il-ġbir ta’ fondi għall-ALS Malta.
Bjorn qal li dak kollu li għamel fl-aħħar snin qed jisfaxxa fix-xejn hekk kif The Malta Community Chestfund Foundation ħadet din id-deċiżjoni tat-tieni inizzjattiva tal-Istrina bl-isem ta’ “Għinuna Ngħinukom” mingħajr ma kkunsidrat li hemm attività oħra ta’ ġbir ta’ fondi li kienet ilha li tħabret mill-bidu tas-sena.
Bjorn kompla jgħid li dan il-pass wassal biex se jkun qed jillimita kull ċans li jinġabru flus biżżejjed għal DAR Bjorn il-ġdida.
Minn naħa l-oħra, f’botta u risposta mingħajr ma ssemma isem Bjorn, Jason Micallef qal f’post li tefa’ fuq Facebook tiegħu li l-attakk li sar fuq L-Istrina kien wieħed vili u huwa biss attakk sfrenat kontra din l-inizzjattiva b’solidarjetà.
F’kumment li sar minn omm Bjorn innifsu, Carmen Formosa qalet li dan l-attakk li sar fuq binha mhux xieraq b’mod speċjali meta tqis ix-xogħol kollu li sar u għadu jagħmel għal persuni li qed ibatu mill-kundizzjoni tal-ALS f’pajjiżna minkejja li hu stess għaddej minn żmien tant diffiċli.
U dan fost għexieren ta’ kummenti tan-nies fejn qed jitolbu lil Jason Micallef jiskuża ruħu tal-attakki tiegħu fil-konfront ta’ Bjorn Formosa.
Fi tweġiba għad-diskors li sar minn Jason Micallef, Bjorn qal li hu qed jitlob biss possibilità biex tinsab soluzzjoni għall-ġid tal-poplu kollu.
Il-kontroversja tant kibret li l-botti baqgħu għaddejin anke l-Ħadd, bil-kandidat Laburista Jeffrey Pulicino Orlando jattakka lic-chairman tas-Super One għax għajjar individwu b’marda terminali. Dan sempliċiment għax appella għal bdil ta’ data ta’ ġbir ta’ fondi biex ma jkunx hemm żewg inizjattivi simili fl-istess żmien.
