Ħdax-il għaqda qed jagħmlu appell lill-Gvern biex jikkunsidra mill-ġdid d-deċiżjoni li jinjora l-wegħda elettorali tiegħu li joffri servizz ta’ fast-ferry li jgħaqqad il-port tal-Mġarr mal-Port il-Kbir, biex minfloku jintroduċi servizz ta’ trasport bil-baħar tat-tip hop-on, hop-off.
Dan is-servizz mhux se jaqdi l-bżonnijiet tal-passiġġiera Għawdxin u Maltin li jaqsmu bejn Malta u Għawdex ta’ kuljum, u jonqos milli jindirizza l-isfidi ta’ konnettività li jħabbtu wiċċhom magħhom l-Għawdxin b’mod tanġibbli u sostenibbli. Il-fast-ferry kienet ilha tiġi mwiegħda għal snin sħaħ, u kienet se tnaqqas bil-kbir id-diffikultajiet li jħabbtu wiċċhom magħhom il-ħaddiema u l-istudenti Għawdxin u dawk li jkollhom jagħmlu l-vjaġġ bil-vapur kuljum, billi kienet se tkun qed tnaqqas il-ħin tal-ivvjaġġar u tnaqqas it-traffiku veikulari bejn iż-żewġ gżejjer.
Bl-introduzzjoni ta’ skema li hija sempliċiment mezz ta’ investiment għas-settur privat, minflok servizz ta’ fast-ferry, il-Gvern qed jittradixxi lit-3,300 impjegat Għawdxi li jaħdmu f’Malta, u li verament għandhom bżonn soluzzjoni tat-trasport effiċjenti mill-aktar fis.
Il-fatt li l-Gvern jibqa’ ossessjonat bil-pjan tiegħu li jibni mina għall-karozzi, li tieħu snin u tiswa l-miljuni biex titlesta, u li xorta mhux se tkun qed tnaqqas il-ħin tal-ivvjaġġar b’mod sinifikanti, filwqt li jinjora soluzzjonijiet oħra alternattivi u aktar effiċjenti, imur kontra kull loġika.
Il-proċess tas-sejħa għall-offerti għas-servizz ta’ fast-ferry bejn il-Belt Valletta u l-Mġarr kien imtappan bil-kontroversji, u ġie sospiż wara allegazzjonijiet ta’ aġir diskriminatorju u inġust. Aktar kmieni dan is-sajf ħarġet it-tielet sejħa għall-offerti, din id-darba iżda għal servizz ta’ trasport fuq il-baħar b’lanċa tat-tip hop-on, hop-off minn mill-inqas ħames lokalitajiet li jmissu mal-baħar.
Din bl-ebda mod ma tista’ taqdi bl-istess mod il-bżonnijiet tal-Għawdxin bl-istess mod bħas-servizz tal-fast-ferry li kien ġie mwiegħed oriġinarjament. Is-servizz ta’ fast-ferry li jgħaqqad l-Mġarr u l-Belt kien se jipprovdi konnessjoni bla xkiel għall-passiġġiera Għawdxin, li jkollhom jaqsmu ta’ kuljum. Is-servizz il-ġdid hop-on, hop-off jidher li se jkun qed jieqaf f’diversi portijiet f’Għawdex u f’Malta, u għalhekk mhux se jkun qed jipprovdi konnessjoni veloċi u bla waqfien li hija tant bżonnjuża għall-passiġġiera Għawdxin. Barra minn hekk, ma ġiet ippreżentata l-ebda evidenza li l-frekwenza tas-servizz li qed tiġi proposta se tkun qed taqdi n-numru ta’ Għawdxin li jaqsmu l-fliegu kuljum.
Sorsi qrib l-industrija marittima saħqu li huwa evidenti kif l-aħħar dokument tas-sejħa għall-offerti ġie mfassal bl-għan ewlieni li jakkomoda l-bżonnijiet ta’ operatur wieħed biss. Għalhekk bilfors ikollna nistaqsu jekk hemmx xi konnessjoni bejn is-sospensjoni tal-proċess tas-sejħa għall-offerti għall-fast-ferry u t-tħaddim ta’ servizz ġdid skedat ta’ hop-on, hop-off għat-turisti fil-port tal-Mġarr. Wieħed ma jistax jinjora x-xebh bejn l-iskema proposta mill-Gvern u s-servizz hop-on, hop-off li għadu kif ġie mniedi. Tidher kemxejn koinċidenza stramba l-fatt li servizz ġdid bil-katamaran operat minn Captain Morgan beda jopera ġurnata biss wara li ġie mħabbar li l-proċess tas-sejħa għall-offerti għall-fast-ferry ġie sospiż.
Fid-dawl ta’ dan kollu, dawn l-għaqdiet qed jitolbu trasparenza sħiħa min-naħa tal-Gvern, u sabiex jiġu ppubblikati studji li jiġġustifikaw id-deċiżjoni tiegħu li jwarrab il-pjan għall-fast-ferry u jagħżel li jintroduċi servizz hop-on, hop-off minflok. Il-Ministru Ian Borg għandu jieqaf jistqarr li l-iskemi tiegħu huma appoġġjati mill-Għawdxin, meta l-organizzazzjonijiet ewlenin Għawdxin ikkritikaw id-deċiżjoni tal-Gvern li jissospendi l-proċess għas-sejħa għall-offerti għall-fast-ferry. Il-Gozo Business Chamber, il-Gozo University Group, u l-Gozo Tourism Association kollha kkundannaw pubblikament l-azzjonijiet tal-Gvern, u appellawlu biex jerġa’ jniedi l-pjan tiegħu għal servizz ta’ fast-ferry bla punt ta’ waqfien bejn l-Mġarr u l-Belt.
Huma jtennu l-appell tagħna lill-Gvern biex isib soluzzjonijiet fit-tul, adegwati u sostenibbli li jistgħu verament jindirizzaw l-isfidi ta’ mobbiltà u konnettività ta’ Għawdex.
- Association for Gozitan Employees
- Bicycle Advocacy Group
- BirdLife Malta
- Din l-Art Helwa
- Extinction Rebellion Malta
- Flimkien għal Ambjent Aħjar
- Friends of the Earth Malta
- Isles of the Left
- Moviment Graffitti
- Nature Trust Malta
- The Archaeological Society of Malta