Il-Gvern fil-Lvant tal-Libja — l-amministrazzjoni rivali tal-Gvern ta’ Tripli li qed jingħata appoġġ min-Nazzjonijiet Uniti – irriżenja wara protesti dwar kundizzjonijiet tal-għajxien inaċċettabbli u sitwazzjoni ta’ korruzzjoni ‘endemika’. Intant, ir-riżenja teħtieġ li tkun approvata mill-Gvern ta’ Tobruk.
Fi tmiem il-ġimgħa, dimostranti f’Benghazi taw in-nar lill-kwartieri-ġenerali tal-Gvern alleat mal-Ġeneral Khalifa Haftar li kien dam aktar minn sena jmexxi assedju fuq Tripli. Dan sakemm il-qawwiet tal-Gvern (rivali) għall-Għaqda Nazzjonali mmexxi mill-Prim Ministru Fayez al-Sarraj irnexxielhom – bl-għajnuna tat-Turkija – jitfgħu lura lit-truppi ta’ Haftar mill-front tal-gwerra fil-kapitali u l-madwar.
Ftit xhur ilu, rapport tan-NU irrefera għall-preżenza, fil-Libja, ta’ mijiet ta’ merċenarji tal-Grupp Wagner — li l-kap tiegħu hu assoċjat qarib tal-President Russu Vladimir Putin – fuq in-naħa ta’ Haftar; li, fl-offensiva, kien appoġġjat ukoll mill-Emirati Għarab Magħquda u l-Eġittu.
Sadanittant, fl-aħħar sigħat — u għall-ewwel darba — kien hemm ukoll il-konfronti fl-inħawi ta’ Al-Maj, li huma fortizza ta’ Haftar. Id-dimostranti ġġieldu mal-qawwiet tas-sigurtà ta’ Haftar fost rapporti li xi ċivili tilfu ħajjithom.
Kelliem għal Haftar qal li l-Gvern Libjan tal-Lvant hu favur li jsiru protesti paċifiċi ‘iżda ma kienx jippermetti li t-terroristi u l-membri tal-Fratellanza Musulmana jużaw id-dimostrazzjonijiet għall-iskopijiet qattiela tagħhom’.
Il-Libja ilha mifnija bil-vjolenza mindu l-poplu, bl-għajnuna tal-qawwiet tan-NATO , keċċa r-reġim tal-eksdittatur Muammar Gaddafi fl-aħħar tal-2011,
//= $special ?>