L-Avukat Ġenerali Victoria Buttigieg ikkonfermat li għalissa mhux se tirrilaxxa kopja tal-inkjesta li saret, u ġiet konkluża, dwar l-allegat tixħim bejn Keith Schembri u Brian Tonna ta’ Nexia BT – skandlu li dwaru kien hemm ukoll investigazzjoni serjissima mill-FIAU, liema investigazzjoni allegatament baqgħet fuq l-ixkaffa.
F’ittra, li kienet ippubblikata mill-avukat Jason Azzopardi, jintqal li “fiċ-ċirkustanzi, l-ebda kopja tal-proċess verbal mhu se jiġi rilaxxat f’dan l-istadju”.
Stqarrija mill-għaqda Repubblika
L-abbuż minn persuni f’karigi pubbliċi huwa materja ta’ interess pubbliku, aktar w’aktar meta l-abbuż allegat ikun marbut ma’ uffiċċju pubbliku. Repubblika tinnota t-talba li saret dwar inkjesta mibdija f’April 2017 dwar allegat tixħim bejn Keith Schembri u Brian Tonna.
Repubblika tistenna li l-Avukat Ġenerali twettaq id-dmirijiet tagħha u tieħu l-passi kollha meħtieġa fid-dawl ta’ dak misjub.
Niftakru li din l-inkjesta inbdiet kważi tliet snin u nofs ilu; nittamaw li m’hemmx interess li din tibqa’ fuq l-ixkaffa. Niftakru wkoll li hemm inkjesti maġisterjali oħra dwar allegazzjonijiet ta’ korruzzjoni minn uffiċjali pubbliiċi li ilhom għaddejja snin sħaħ.
//= $special ?>