Fi stqarrija, l-avukat Bernard Grech – wieħed mill-kandidati għat-tmexxija tal-PN – spjega li martu Anne Marie irriżultat pożittiva għall-Covid-19.
“Wara li Anne Marie saret taf li kien hemm każ pożittiv ta’ persuna li tattendi fil-gym li tattendi hi, fuq parir tad-Dipartiment tas-Saħħa Pubblika, il-mara tiegħi iżolat ruħha mill-ewwel u ħadet test li ħareġ negattiv. Minkejja dan fuq parir tal-istess awtoritajiet mediċi baqgħet f’iżolament, u wara li ħadet test ieħor, issa dan irriżulta pożittiv.”
Grech stqarr li waqt dan il-perjodu minn meta martu saret taf bil-każ pożittiv hu ma kienx f’kuntatt magħha. Minkejja dan qiegħed jieħu d-deċiżjoni li minnufiħ jiżola ruħu b’mod prekawzjonali u qed isegwi l-pariri tal-professjonisti mediċi li qed jassistuh.
“Għalkemm jien m’għandi l-ebda sintomi, il-preżenza fiżika tiegħi f’din il-kampanja qiegħda tiġi sospiża”, stqarr Bernard Grech.
“Sakemm jinħareġ aġġornament ieħor, is-sehem tiegħi f’din il-kampanja se jkun wieħed virtwali. Ser nagħmel dak kollu possibbli biex nibqa’ f’kuntatt magħkom b’kull mezz possibbli f’dawn iċ-ċirkostanzi.”
//= $special ?>