Il-kumpanija Gasan se tipprova toħroġ mid-deal tal-Electrogas hekk kif il-kontroversja marbuta ma’ dan il-proġett tal-powerstation qed tkompli tikber.
Fi stqarrija mill-grupp Gasan intqal illi “fid-dawl tal-kontroversja dwar dan il-proġett u irrispettivament mill-fatt li m’għamlu xejn ħażin, iddeciedew li jidentifikaw it-toroq kollha biex joħorġu mill-progett, u ma japprofittaw bl-ebda mod minn dan l-investiment”
Fl-istqarrija ffirmata miċ-chairman Joe Gasan u l-Kap Eżekuttiv Mark Gasan, il-kumpanija qalet li ma rċeviet l-ebda dividendi għall-investiment fl-Electrogas u li kienet “irreġistrat biss telf.”
Il-kumpanija Gasan għandha sehem ta’ 11.72 fil-mija fil-konsorzju tal-power station tal-gass – progett li ilu għal żmien twil jaffronta allegazzjonijiet serji ta’ korruzzjoni li wħud minnhom qed joħorġu wkoll fl-Inkjesta Pubblika dwar l-assassinju Daphne Caruana Galizia.
Gasan Enterprise hija waħda mit-tliet kumpaniji immexxija minn Maltin li investew f’dan il-proġett tat-tanker tal-gass. Dan flimkien mal-familja Fenech ta’ Tumas Group u l-familja Apap Bologna. It-tlieta flimkien għandhom GEM Holdings, li għandha sehem ta’ 33 fil-mija fil-proġett Electrogas.
Il-ġganti Ġermaniżi Siemens u l-kumpanija tal-enerġija tal-Istat tal-Ażerbajġan SOCAR għandhom il-bqijja tal-ishma f’dan id-deal.
B’reazzjoni għal din l-aħbar, l-għaqda Repubblika qed tqis li mhux biżżejjed li l-familja Gasan tiddikjara li qed tara kif toħroġ mill-Electrogas, għalkemm dan huwa pass tajjeb.
Repubblika qalu li l-ġerħa nazzjonali tal-kuntratt maħmuġ tal-power station ta’ Joseph Muscat u Konrad Mizzi li jidher li għandu rabta mal-qtil ta’ Daphne Caruana Galizia tesiġi li tkun magħrufa il-verità sħiħa u li ssir ġustizzja fejn kulħadd jirrispondi għal dak li għamel.
Huma qalu li jistennew li l-familja Gasan verament toħroġ il-verità sħiħa dwar; kif inħema dan il-kuntratt, il-laqgħat li saru qabel, waqt u wara il-proċess tat-tender, l-arranġamenti dwar shareholding li jindikaw li kien hemm flus li kienu ser jgħaddu lil Keith Schembri u Konrad Mizzi fost l-oħrajn, ir-relazzjoni ma’ 17 Black u kull aspett ieħor marbut ma’ din il-fabbrika ta’ korruzzjoni.
Repubblika qed tistenna li l-kumpanijji involuti f’dan id-deal iwettqu l-obbligu tagħhom biex jinħatt dak li sejħu “monument ta’ korruzzjoni li Daphne Caruana Galizia ħallset għalih b’ħajjitha u l-poplu Malti qed iħallas għalih meta jħallas il-kontijiet tal-elettriku.”
