Il-Mexxej komunista tal-Korea ta’ Fuq, Kim Jong-un, ħareġ b’messaġġ personali – u rari – ta’ apoloġija wara l-qtil ta’ uffiċjal tal-Korea t’Isfel. Il-qtil kien l-ewwel wieħed ta’ ċittadin mill-Korea t’Isfel taħt idejn il-qawwiet Koreani komunisti għal għaxar snin u qajjem għadab kbir fost il-kompatrijotti tiegħu.
Intant. Kim Jong-un informa lill-President tal-Korea t’Isfel, Moon Jae-in, li l-inċident ma messu seħħ qatt u ‘għandu jqajjem sens ta’ għajb’.
Il-Korea t’Isfel qalet li l-vittma – raġel ta’ 47 sena – kien instab mis-suldati Koreani komunisti meta kien f’zona ta’ baħar amministrata mill-Korea ta’ Fuq.Ir-rapporti qalu li l-uffiċjal, imbagħad, inqatel b’diversi tiri — bil-katavru tiegħu, wara, jingħata n-nar.
Il-fruntiera bejn l-Istati Koreani rivali qed tinżamm taħt osservazzjoni kontinwa mill-qawwiet taż-żewġ naħat. Intant, l-indikazzjonijiet huma li l-Korea ta’ Fuq adottat politika li tesiġi biex is-suldati komunisti ‘jiftħu n-nar fuq il-barranin f’dik iz-zona, bil-ħsieb li joqtluhom’ bl-iskop li l-coronavirus ma tinfirixx għal pajjiżhom.
L-apoloġija ta’ Kim Jong-un seħħet fil-forma ta’ ittra lill-President Moon u li fiha, il-Mexxej komunista qal li ‘jiddispjaċih talli ddiżappunta lil Moon u lill-poplu tal-Korea t’Isfel’.
Il-Korea ta’ Fuq anki provdiet dettalji tal-investigazzjoni u meta qed tgħid li kienu sparati aktar minn għaxar tiri lejn l-uffiċjal ‘li kien spiċċa fl-ibħra inkwistjoni u li pprova jaħrab wara li kien naqas milli jidentifika ruħu.’ Il-kelliema komunisti, intant, qalu li ‘is-suldati taw in-nar lill-oġġett li nstab fuqha l-vittma, iżda mhux lill-katavru tar-raġel’.
L-osservaturi jaqblu li dan l-inċident seta rriżulta fi tmiem diżastruż għall-impenji lejn taħditiet ġodda bejn Kim Jong-un u l-President Moon. Madankollu, il-Mexxej komunista, permezz tal-ittra, jista’ qed jindika l-intenzjonijiet tiegħu biex jaqbad mill-ġdid it-triq ta’ djalogu mal-ġar.
Dan meta l-poplu tal-Korea ta’Isfel għadu xukkjat u rrabjat dwar l-inċident li qed jidher bħala l-qtil bla ħniena ta’ raġel mhux armat f’zona ta’ baħar tal-Korea komunista – bl-inċident ifakkar mill-ġdid fl-aġir brutali kontinwu tar-reġim fi Pyongyang.
//= $special ?>