Il-qawwiet tal-Armenja u l-Ażerbajġan daħlu mill-ġdid fil-konfronti armati ma’ xulxin, meta fin-nofs hemm il-jeddijiet tal-Istati rispettivi fuq ir-reġjun ta’ Nagorno-Karabakh. Dan ir-reġjun ilu l-għexieren tas-snin joħloq tensjoni kbira bejn il-pajjiżi rivali, bir-rapporti dwar l-aħħar konfronti jsostnu li li l-Ażerbajġan tilef ‘numru ta’ ħelikopters u tankijiet tal-gwerra waqt il-ġlied.’
L-Armenja qalet li l-Ażerbajġan wettaq sensiela ta’ attakki bl-artillerija u l-qawwiet tal-ajru tiegħu – bl-Armeni ma jitilfux iż-żmien biex jiddikjaraw liġi marzjali fost il-mobilizzazzjoni totali tal-militar tagħhom.
Iż-żewġ naħat irrappurtaw l-imwiet ta’ membri tal-popolazzjoni, bl-Ażerbajġan isostni li l-qawwiet tiegħu kienu qed iwieġbu ‘għall-bumbardamenti mill-avversarji tul iz-zona tal-konflitt’.
L-Ażeri qalu li l-bumbardamenti intensivi ta’ villaġġi ħallew diversi ċivili mejtin jew midruba. Dan fost il-konferma ta’ ‘kontro-offensiva mit-truppi tal-Ażerbajġan bil-għan li jħarsu s-sigurtà tal-poplu ċivili’.
Madankollu, il-Ministeru tad-Difiża tal-Armenja qal li l-qawwiet Ażeri kienu attakkaw xi zoni ta’ ċivili, fosthom il-kapitali reġjonali Stepanakert, u fejn il-qawwiet Armeni rnexxielhom iwaqqgħu żewġ ħelikopters u tliet drones, minbarra li qerdu talanqas tliet tankijiet tal-gwerra tal-Ażerbajġan.
L-Ażerbajġan qed jiċħad għal dan it-telf u qal biss li ntilef ħelikopter minn tiegħu, bl-ekwipaġġ jirnexxilu jsalva.
Il-President Ażeri, Ilham Aliyev, akkuża lill-Armenja ‘b’li qed tmexxi gwerra ġdida għal aktar territorji’ u sostna li l-Armeni ‘iridu jħallsu l-prezz wara li ilhom żmien jipprovokaw lil pajjiżu’.
Mill-banda l-oħra, l-awtoritajiet Armeni qed isostnu li ‘it-tmexxija militari u politika tal-Ażerbajġan għandha tieħu responsabbiltà sħiħa għas-sitwazzjoni li qed tiżviluppa’. Dan waqt li l-Prim Ministru Armen, Nikol Pashinyan, akkuża lill-Ażerbajġan dwar ‘azzjonijiet aggressivi li kienu pjanati minn qabel’.
L-Armenja u l-Ażerbajġan kienu jiffurmaw parti mill-Unjoni Sovjetika qabel il-kroll tal-entità komunista, fl-1991. L-Armeni u l-Ażeri, intant, ilhom talanqas 40 sena ‘fi stat ta’ paraliżi’ fost din is-sitwazzjoni ta’ konflitt dwar Nagorno-Karabakh, li hu rikonoxxut ( fuq livell internazzjonali) bħala parti mill-Ażerbajġan filwaqt li hu kontrollat mill-Armeni etniċi.
