Kwalunkwe spinta fil-konfront militari attwali bejn il-qawwiet tal-Armenja u l-Ażerbajġan kapaċi taffettwa jew anki tiddistabbilizza lis-swieq internazzjonali.
Dan għaliex il-konflitt li reġa żbroffa bejn iż-żewġ Stati rivali dwar ir-reġjun polemikuż ta’ Nagorno-Karabakh jista’ jħalli r-riperkussjonijiet ‘il hinn min-Nofsinar tal-Kawkasu minfejn għaddejjin il-pipelines li jwasslu ż-żejt u l-gass naturali mill-Baħar Kaspjan lejn is-swieq tad-dinja.
L-aħħar ġlied, li żbroffa nhar il-Ħadd, bejn il-qawwiet Armeni u Ażeri hu l-agħar fir-reġjun għal ħafna snin. Ir-rapporti qalu li mietu talanqas 25 (fosthom ċivili) fil-konfronti meta l-Armenja u l-Ażerbajġan – it-tnejn eks Repubbliċi Sovjetiċi – qegħdin jinsistu bid-drittijiet rispettivi fuq Nagorno-Karabkh.
Il-ġlied f’Nagorno-Karabakh qed ikompli, bħalissa, bil-kelliema għall-qawwiet avversarji jinsistu dwar ‘vantaġġ’ minn aspett militari
Il-komunità internazzjonali tirrikonoxxi lir-reġjun ta’ Nagorno-Karabakh (qalb il-muntanji tal-Kawkasu) bħala parti mill-Ażerbajġan – iżda hu minnu wkoll li t-territorju inkwistjoni hu kontrollat mill-Armeni etniċi. Il-konflitt, intant, ilu jistenna soluzzjoni għal aktar minn 30 sena.
Il-President Ażeri, Ilham Aliyev, issa qal li hu fiduċjuż li jikseb lura l-kontroll fuq ir-reġjun sħiħ ta’ Nagorno-Karabakh. Dan meta qed tkun imposta l-liġi marzjali f’diversi partijiet tal-Ażerbajġan, bl-Armenja u Nagorno-Karabakh ukoll qed jimplimentaw il-miżura.
Il-liġi marzjali tinvolvi miżura ta’ emerġenza li tippermetti biex il-militar jassumi l-awtorità u l-funzjonijiet ta’ gvern ċivili.
Intant, in-Nazzjonijiet Uniti u numru ta’ pajjiżi qegħdin isegwu b’ansjetà l-iżviluppi fir-reġjun delikat, bis-Segretarju-Ġenerali tan-NU, Antonio Guterres, jisħaq li ‘hu preokkupat ħafna’ dwar il-konflitt bejn l-Armeni u l-Ażeri.
Guterres qed isejjaħ biex l-Armenja u l-Ażerbajġan jieqfu mill-ġlied immedjatament waqt li Franza – li għandha komunità kbira ta’ Armeni – ukoll sejħet biex il-pajjiżi avversarji jieħdu pass lura u jissieħbu fi djalogu.
Il-President tal-Istati Uniti, Donald Trump qal li pajjiżu ‘qed jieħu l-inizjattivi biex iwaqqaf il-vjolenza f’dik iz-zona ta’ gwerra’ waqt li l-Iran – l-għadu qalil tal-Istati Uniti u li jaqsam fruntiera mal-Armenja u l-Ażerbajġan – offra li jisponsorja taħditiet ta’ paċi bejn ir-rappreżentanti ta’ Yerevan u Baku.
Intant, ir-Russja, alleata tradizzjonali tal-Armenja, qed tħeġġeġ għal waqfien mill-ġlied immedjat waqt li l-President tat-Turkija, Recep Tayyip Erdogan, impenja l-appoġġ tiegħu lill-Ażerbajġan waqt li talab ‘biex id-dinja tappoġġja lill-Ażeri f’din il-battalja’.
//= $special ?>