Il-President Amerikan u l-First Lady it-tnejn ittestjaw pożittiv għall-Covid-19 wara li lbieraħ Hope Hicks, waħda mill-persuni l-eqreb ta’ Donald Trump tul il-kampanja elettorali irriżultat pożittiva għall-virus.
Il-President Amerikan ħabbar dan fi Tweet ftit tal-ħin ilu.
Donald u Melania Trump skoprew li t-tnejn kienu pożittivi għall-virus wara li kienu iżolaw ruħhom hekk kif saru jafu li Hicks kienet infettata.
Hicks kienet f’kuntatt mill-qrib mal-koppja waqt li kienet qed tivvjaġġa mal-President u martu abbord il-Helicopter Marine One u fuq Air Force One fil-jiem li għaddew u l-konsulenta ta’ Trump saħansitra dehret bla maskra hi u nieżla minn fuq il-jet presidenzjali.
Donald Trump għandu 74 sena filwaqt li martu Melania għandha 50 sena.
Il-President Amerikan kemm-il darba kien kontroversjali fid-diskors tiegħu dwar il-virus, u diversi drabi kien akkużat li kien qed ikun qarrieqi fil-mod li kien qed jitkellem dwaru.
L-Istati Uniti rreġistraw aktar minn seba’ miljun każ tal-virus, u kellhom mal-200,000 mewta bil-Covid.
