“Lest biex inservi lill-poplu. Ejjew magħna. Din hi l-mixja ta’ dawk li jridu jifdu lill-pajjiż mill-ħakma tal-kriminali.” Din hi d-dikjarazzjoni li għamel Bernard Grech fl-ewwel diskors tiegħu wara l-elezzjoni li fiha kien elett bħala Kap ġdid tal-Partit Nazzjonalista.
Bernard Grech irringrazzja lit-tesserati kollha li vvutaw f’din l-elezzjoni.
Hu saħaq li din kienet rebħa għall-PN, u mhux telfa għal Adrian Delia jew rebħa għal Bernard Grech.
Il-Kap tal-PN irringrazzja lil Adrian Delia li sab il-kuraġġ li joffri lealtà assoluta għall-partit. “Minn għada inpoġġu lil flimkien biex insaħħu l-partit”, qal Bernard Grech.
F’mument emozjonanti, Bernard Grech sellem lill-familja tiegħu għall-appoġġ kbir matul dawn il-ġranet.
Dan ir-riżultat wassal fi tmiemha l-Konvenzjoni Ġenerali tal-PN, li ingħalqet mill-President Ċensu Galea.
