Il-qawwiet tal-Armenja, fl-aħħar sigħat, fetħu bumbardament qalil fuq l-inħawi ta’ Ganja, it-tieni l-akbar belt tal-Ażerbajġan, waqt li kompla l-ġlied feroċi bejn il-qawwiet Armeni u Ażeri li qed jinsistu għall-kontroll sħiħ tar-reġjun ta’ Nagorno-Karabakh.
Ir-reġjun polemikuż hu uffiċjalment parti mill-Ażerbajġan iżda ilu s-snin jitmexxa mill-Armeni etniċi. Kemm ilu li żbroffa l-aħħar ġlied f’Nagorno-Karabakh (mill-aħħar tax-xahar li għadda) mietu ‘il fuq minn 100 persuna, li ħafna minnhom huma ċivili.
Sadanittant, l-awtoritajiet Armeni-etniċi f’Nagorno-Karabakh qalu li fetħu bumbardamenti ‘preċiżi’ fuq l-ajruport militari ta’ Ganja. L-isparar tal-artillerija kien ritaljazzjoni għall-bumbardamenti tal-qawwiet Armeni fuq l-inħawi ta’ Stepanakert, il-kapitali ta’ Nagorno-Karabakh.
Hemm ukoll sinjali li ċ-ċifra tal-mejtin hi ħafna ogħla milli qed jiżvelaw l-awtoritajiet tal-Armenja u l-Ażerbajġan. Dan għaliex iċ-ċifri tal-vittmi li qed jipproduċu n-naħat avversarji ma kenux ivverifikati mis-sorsi indipendenti.
L-Armenja u l-Ażerbajġan it-tnejn qegħdin iwaħħlu f’xulxin għall-agħar konfronti militari ta’ bejniethom mill-2016 ‘il hawn.
Intant, il-militar tal-Ażeri qal li l-qawwiet tiegħu, fl-aħħar sigħat, ħadu lura l-kontroll f’seba’ villaġġi. Dan waqt li l-Armeni-etniċi f’Nagorno-Karabakh qed jinsistu li t-truppi tagħhom ‘ikkonsolidaw u tejjbu’ l-pożizzjonijiet tagħhom f’dik iz-zona ta’ gwerra.
L-Ażerbajġan, li qed jingħata appoġġ sħiħ mit-Turkija f’dan il-konflitt, qiegħed jinsisti għall-irtirar tas-suldati Armeni minn Nagorno-Karabakh u l-madwar, meta l-inħawi għalissa huma kontrollati mill-Armeni-etniċi. Dan wara li l-Armenja qalet li hi lesta ‘għal kuntatti’ mal-medjaturi ta’ Franza, ir-Russja u l-Istati Uniti li qed jippruvaw iwasslu għal waqfien mill-ġlied.
Fl-aħħar sigħat, il-Ministru tad-Difiża Ażeri, Zakary Hasanov, tkellem dwar il-bumbardamenti fuq Ganja, lejn it-tramuntana ta’ Nagorno-Karabakh, u sostna li ‘l-azzjoni tal-Armeni serviet biex tkabbar l-iskala tal-konflitt’. Għalkemm l-Ażeri ma provdewx statistika uffiċjali dwar vittmi u ħsarat f’Ganja, ħarġu diversi ritratti u filmati li wrew numru ta’ bini li nqerdu fil-bumbardamenti.
Intant, l-awtoritajiet Armeni-etniċi f’Nagorno-Karbakh qalu li rnexxielhom jeqirdu l-ajruport militari ta’ Ganja li kienet qed tintuża mill-qawwiet Ażeri biex jattakkaw liċ-ċivili tal-Armenja. Dan meta l-missili tal-Ażeri li niżlu fl-aħħar sigħat fuq Stepanakert ħallew ‘numru konsiderevoli ta’ vittmi’, b’din il-belt anki tispiċċa mingħajr provvista tad-dawl.
L-istess awtoritajiet f’Nagorno-Karabakh, fl-istess ħin, wissew li l-faċilitajiet militari li huma stazzjonati fl-ibliet il-kbar tal-Ażerbajġan issa saru ‘mira leġittima tal-qawwiet tagħhom’.
