Il-Pulizija fil-Belarus arrestaw ‘il fuq minn 320 persuna waqt il-protesti tal-Ħadd kontra t-tmexxija tal-President Alexander Lukashenko li saru f’Minsk u bliet oħra tal-pajjiż.
L-arresti kienu konfermati mill-Ministeru għall-Intern wara li għexieren ta’ eluf ta’ dimostranti mmarċjaw miċ-ċentru tal-kapitali biex jinsistu li l-awtoritajiet jeħilsu lill-priġunieri politiċi. Intant, seħħew numru ta’ inċidenti f’Minsk, bil-pulizija tispara l-kanuni tal-ilma għal fuq il-folol.
Id-dimostrazzjoniiet kienu l-aħħar f’sensiela ta’ azzjonijiet mill-poplu tal-Belarus li qed jinsisti biex Lukashenko iwarrab mill-poter wara 26 sena bħala l-Mexxej ta’ pajjiżu.
Dan wara li Lukashenko reġa’ kien elett fl-elezzjoni tas-sajf u meta ħafna ċittadini huma konvinti li hu kiseb mandat ġdid ta’ tmexxija ‘bil-qerq u l-frodi’.
