L-isfidanti għar-rwol ta’ Viċi-President tal-Istati Uniti tlewwmu dwar ‘nuqqasijiet mill-kamp oppost’ li huma relatati mal-pandemija tal-Covid-19 fil-pajjiż. Dan seħħ waqt li l-uniku dibattitu bejn dawn l-isfidanti qabel l-elezzjoni tax-xahar id-dieħel li tiddeċiedi min – bejn il-President Donald Trump u l-isfidant Joe Biden – għandu jmexxi l-pajjiż għall-erba’ snin li jmiss.
Il-kandidat tal-Partit Demokratiku, Kamala Harris, ma żammitx lura milli tikkundanna l-mod kif Trump mexxa pajjiżu waqt il-pandemija u sostniet li l-aġir tiegħu ‘jirrifletti l-akbar falliment ta’ kwalunkwe tmexxija ta’ President Amerikan fl-istorja’. Hi kompliet li ‘il-President u l-Viċi-President attwali mexxew ħażin bi ħsieb lill-Amerikani dwar il-potenzjal fatali tal-coronavirus’.
Intant, Mike Pence, il-Viċi-President Repubblikan tal-Istati Uniti, iddefenda l-politika tal-Gvern u qal li l-pjan tad-Demokratiċi għall-kontroll tal-pandemija ‘hu kollu kemm hu ikkupjat mill-istrateġiji tar-Repubblikani’.
Id-dibattitu, fl-Università ta’ Utah, f’Salt Lake City, ixxandar dirett lin-nazzjon u fl-interventi spikka d-diżgwid kontinwu dwar il-politika tal-Gvern ta’ Trump, intiża biex trażżan l-impatt tal-Covid-19 madwar il-pajjiż.
Skont l-aħħar stħarriġ ta’ opinjoni, Joe Biden qed igawdi vantaġġ fuq Donald Trump, meta fadal 25 ġurnata għall-vot importanti ta’ Novembru.
//= $special ?>