L-aħħar rapporti mir-reġjun ta’ Nagorno-Karabakh irreferew għal waqtiet ta’ ġlied ġodda – b’mod partikulari bumbardamenti – bejn il-qawwiet tal-Armenja u l-Ażerbajġan; bl-iżviluppi jseħħu sigħat biss wara li daħal fis-seħħ ftehim għall-waqfien mill-ostilitajiet.
L-istampa tal-Armenja qalet li l-belt ta’ Stepanakert, il-kapitali ta’ Nagorno-Karabakh, intlaqtet minn balal tal-artillerija, waqt li l-Ażeri sostnew li l-inħawi ta’ Ganja ntlaqtu mill-ġdid mill-missili sparati mill-militar tal-Armenja.
F’Ganja, blokk ta’ appartamenti spiċċa kompletament meqrud ‘wara li ntlaqat direttament minn missila tal-Armeni’. L-uffiċjali lokali sostnew li seba’ residenti mietu fl-attakk li ħalla wkoll għexieren ta’ midruba. Madankollu, l-Armenja qed tiċħad kategorikament li wettqet l-attakki fuq iz-zoni okkupati minn ċivili. Dan meta l-Armeni u l-Ażeri, fl-aħħar sigħat, akkużaw lil xulxin bħala ‘l-aggressur responsabbi minn aktar bumbardamenti’.
L-akkużi mhumiex jonqsu minkejja li ż-żewġ Stati rivali — wara ġimgħatejn ta’ battalji ħorox – fi tmiem il-ġimgħa qablu biex jidħlu fi ftehim għal waqfien mill-ġlied temporanju, fost taħditiet li kienu għaddejjin f’Moska ( fir-Russja).
Sadanittant, Arayik Harutyunyan, li hu l-mexxej tar-reġjun ta’ Nagorno-Karabakh, qal, il-bieraħ, li s-sitwazzjoni ‘kienet xi ftit aktar kalma’ iżda għamilha ċara li l-ftehim għall-waqfien mill-ġlied kien xorta waħda fi stat prekarju.
Fl-istess ħin, il-ftehim jippermetti biex l-Armenja u l-Ażerbajġan jidħlu fi skambju ta’ priġunieri waqt li jirkupraw il-katavri tal-vittmi tal-aħħar ġlied.
L-aħħar fażi tal-konflitt li bdiet fis-27 ta’ Settembru ħalliet ‘il fuq minn 300 mejtin u eluf ta’ refuġjati, meta l-Armenja u l-Ażerbajġan – it-tnejn eks Stati Sovjetiċi – qegħdin ikomplu jakkużaw lil xulxin bħala l-ixprun wara l-agħar vjolenza fir-reġjun għal għexieren ta’ snin.
Filwaqt li r-Russja qed tawgura li l-Armenja u l-Ażerbajġan jidħlu, issa, għal taħditiet ‘sinifikattivi’, il-Ministeru Armen għall-Affarijiet Barranin qal li taħditiet bħal dawn ‘se jkunu diffiċli’ u li l-Armenja trid li Nagorno-Karabakh (immexxi mill-Armeni etniċi) ikun iddikjarat bħala Stat indipendenti.
Mill-banda l-oħra, il-Gvern Ażeri qed jgħid li ‘l-Armenja ma kenitx suġġetta għal biżżejjed pressjoni’ waqt it-taħditiet f’Moska u li s-sitwazzjoni f’Nagorno-Karabakh ma tistax tibqa’ kif inhi.
