L-Armenja akkużat lit-Turkija – alleata tal-Ażerbajġan – b’li qed tostakola t-titjiriet bl-għajnuna ta’ emerġenza, meta l-ġlied li reġa’ żbroffa dwar il-kontroll ta’ Nagorno-Karabakh qed jhedded kriżi umanitarja kbira għar-reġjun polemikuż, fin-nofsinar tal-Kawkasu.
Filwaqt li t-Turkija tidher li qed tirrifjuta l-użu tal-ispazju tal-ajru tagħha għall-ajruplani li qegħdin iwasslu l-għajnuna liċ-ċivili ta’ Nagorno-Karabakh, l-Armenja u l-Ażerbajġan ma waqfux mill-kontro-akkużi dwar ‘ir-responsabbiltajiet’ lejn il-waqfien mill-ġlied fraġli li ntlaħaq ftit tal-jiem ilu.
Il-ftehim kellu jippermetti biex l-Armeni u l-Ażeri jibdlu l-priġunieri u l-katavri tal-vittmi tal-aħħar konfronti militari li ilhom mis-27 ta’ Settembru u li huma l-aktar feroċi mis-snin disgħin, meta mietu 30,000 fil-konflitt dwar Nagorno-Karabakh. Ir-reġjun ta’ Nagorno-Karabakh hu rikonoxxut bħala territorju tal-Ażerbajġan iżda ilu s-snin amministrat mill-Armeni-etniċi.
Intant, il-President tal-Ażerbajġan, Ilham Aliyev, wissa lill-Armenja ‘biex ma tkomplix tipprova taħtaf lura l-artijiet li kienu liberati’ u li s-sitwazzjoni kapaċi twassal ‘għal aktar tixrid ta’ demm u vittmi’. L-Ażeri qegħdin jgħidu li kisbu ‘vantaġġ’ fil-battalji mal-Armeni tul il-‘linja ta’ kuntatt’ ma’ Nagorno-Karabakh, iżda dan ma kienx ikkonfermat mis-sorsi indipendenti.
Il-Ministeru tad-Difiża tal-Armenja, fl-istess ħin, kompla jakkuża lill-qawwiet tal-Ażerbajġan dwar ‘l-isparar indiskriminattiv tal-artillerija’ lejn iz-zoni ta’ Nagorno-Karabakh, iżda qal ukoll li ‘il-qawwiet Armeni-etniċi fir-reġjun qegħdin jieħdu l-kontro-miżuri effettivi kontra l-attakki’.
Dan fost rapporti – uħud mhumiex ikkonfermati – dwar it-telf ta’ ħajja kontinwa fost il-militar u ċivili tal-Armenja u l-Ażerbajġan.
L-organizzazzjonijiet internazzjonali ta’ fejda qegħdin iwissu li l-konflitt f’Nagorno-Karabakh għandu jħalli għexieren ta’ eluf tan-nies fi ħtieġa urġenti ta’ għajnuna fix-xhur li jmiss,
Dan waqt li uffiċjali tal-Armenja qalu, issa, li t-trasport ta’ madwar 100 tunnellata ta’ għajnuna mill-Istati Uniti spiċċa ‘ostakolat’ peress li t-Turkija mhix tippermetti li t-titjiriet umanitarji destinati għall-Armeni jgħaddu mill-ispazju tal-ajru tagħha.
L-Armeni qed jallegaw li t-Turkija ‘għalqet dik ir-rotta bi ħsieb speċifiku’ u li l-Armenja, issa, qed tfittex rotta alternattiva għat-trasport tal-għajnuna fl-ispazju tal-ajru tar-Russja jew tar-Repubblika ta’ Ġorġja.
//= $special ?>