Ir-Rappreżentant tan-NU għal -Libja tinsab ‘ottimista’ dwar il-prospetti għal waqfien mill-ġlied f’dak il-pajjiż u li jista’ ikun ir-‘riżultat’ tat-taħditiet li għaddejjin bħalissa, f’Ġinevra, bejn id-delegazzjonijiet tan-naħat Libjani avversarji.
Wara jumejn ta’ taħditiet wiċċ-imb-wiċċ fin-Nazzjonijiet Uniti, l-avversarji Libjani li ilhom ix-xhur involuti f’konflitt ċivili qablu biex jiftħu rotot interni mill-art kif ukoll mill-ajru. It-taħditiet fl-Iżvizzera, li qed ikunu mfissra bħala ‘inkoraġġanti’, għandhom ikomplu sas-Sibt. Intant, ir-rappreżentanti Libjani rispettivi qablu wkoll biex jibqgħu jżommu l-kalma fl-artijiet tal-Libja li damu xhur konsekuttivi bħala zoni tal-gwerra.
Kien hemm anki qbil li jħares kontra ‘eskalazzjoni militari’ fil-Libja u għal inizjattivi li jżidu l-produzzjoni taż-żejt minn dan il-pajjiż.
Min-naħa tagħha, Stephanie Williams, li tmexxi l-UN Support Mission in Libya (UNSMIL), qalet li l-entitajiet rivali tal-Libja laħqu qbil dwar diversi issues importanti b’impatt dirett fuq il-ħajja tal-poplu Libjan.
Williams esprimiet ukoll tamiet dwar ‘is-sens tal-impenn’ attwali rigward waqfien mill-ġlied fil-Libja li ilha mifnija minn konflitt mindu tqaċċat ir-reġim tal-eksdittatur Libjan, Muammar Gaddafi, fl-aħħar xhur tal-2011.
