Jum wara taħdidiet individwali f’Washington mis-Segretarju tal-Istat Amerikan, Mike Pompeo, mal-Ministri tal-Affarijiet Barranin tal-Ażerbajġan u l-Armenja bit-tama li jiġi fi tmiemu xahar imdemmi, reġa’ rritorna ġlied fiż-żona ta’ Nagorno Karabakh, fil-konfini tal-Ażerbajġan iżda popolata u mmexxija minn Armeni Etniċi.
Il-Ministeru Ażeri tad-Difiża qal li minn territorju Armen ġew sparati rockets u missilli lejn l-inħawi ta’ Lachin u Gubadli, filwaqt li l-Armeni Etniċi akkużaw lill-forzi Ażeri li sparaw missili f’bini residenzjali fl-akbar belt fir-reġjun, Stepanakert.
Kien irrappurtat li t-truppi Armeni li sfaw vittmi ta’ din il-gwerra tela’ minn 36 għal ftit anqas minn 1,000, filwaqt li l-vittmi Ażeri jlaħħqu l-65 u kważi 300 midruba, bil-President Russu, Vladimir Putin ibassar li t-total globali ta’ dawk maqtula kapaċi jlaħħaq il-5,000.
