Internazzjonali

Il-Pulizija tal-Belarus tuża’ l-forza fuq id-dimostranti; mil-lum ordnat strajk Nazzjonali

Ma taqta’ xejn it-tensjoni fil-Belarus bil-Pulizija jirrikorru għall-użu ta’ stun grendes fuq id-dimostranti. Dan hekk kif il-mexxejja tal-Oppożizzjoni tal-pajjiż Svetlana Tikhanovskaya qed issejjaħ għal strajk Nazzjonali.

Għall-aġir tal-Pulizija, Tikhanovskaya stqarret li r-reġim tal-pajjiż wera’ għal darboħra lin-Nazzjon li hu kapaċi biss li juża l-forza.

Il-Mexxejja tal-Oppożizzjoni tal-Belarus tinsab eżiljata fil-pajjiż ġar, il-Litwanja. Hi kienet tat ultimatum lill-President Alexander Lukashenko biex sal-Ħadd filgħaxija jirreżenja, b’Tikhanovskaya tgħid li jekk huwa ma jagħmilx dan, hi kienet se ssejjaħ għal strajk mil-lum it-Tnejn.

Il-poplu tal-Belarus ilu sa mid-9 t’Awwissu li għadda ta kull tmiem il-ġimgħa jinżel jipprotesta fit-toroq. Dakinhar, Lukashenko, li ilu fil-poter sa mill-1994, kien ħabbar li kien reġa’ rebaħ l-elezzjoni Presidenzjali.