“Sabiex nissaħħu flimkien irridu naċċertaw li jkollna pajjiż sigur fejn kulħadd jgħix mingħajr biża’, fejn ikollna ekonomija mibnija fuq setturi ekonomiċi sodi b’pagi li jrendu.”, hekk qal il-Kelliem tal-Oppożizzjoni għall-Intern Beppe Fenech Adami waqt konferenza tal-aħbarijiet flimkien mas-Sindku tas-Swieqi Noel Muscat, il-Kunsillier tal-PN fil-Gudja Mark Anthony Sammut u l-President tas-Solidarjeta’ Ħaddiema PN Ivan Castillo.
Beppe Fenech Adami qal li l-PN jifhem lill-poplu jinsab inkwetat bil-kriminalita’ f’pajjiżna, li hija realta’ u mhux perċezzjoni. Huwa qal kif f’din s-sena s’issa kien hemm aktar minn 3,526 serqa rrappurtata, 32 hold up, 6 omiċidji u 60 vettura li nħarqet. Għall-PN mhux aċċettabbli li jkollok żoni u lokalitajiet fejn il-Gvern qata’ qalbu fil-ġlieda kontra l-kriminalita’ għax għall-PN kull lokalita’ jistħoqqilha tkun sigura u ċ-ċittadini jkollhom rashom mistrieħa li l-kriminali ma jitħallewx jiksru l-liġi b’impunita’.
Beppe Fenech Adami qal li fil-baġit, il-Gvern naqas li jindirizza din ir-realta’, li jinċentiva l-Pulizija, li jindirizza n-nuqqas ta’ fiduċja li kibret fil-Korp fl-aħħar snin u li jħabbar pjan dettaljat kif se tirrenja s-saltna tad-dritt f’kull lokalita’ biex kull ċittadin jħossu protett mill kriminali. Huwa qal li Gvern Nazzjonalista ġdida jinvesti f’Korp dixxiplinat, organizzat u mgħammar bl-aqwa mezzi biex jiġġieled il-kriminalita’, b’pulizija b’kundizzjonijiet aħjar u mnaddfa minn elementi korrotti.
Noel Muscat enfasizza li ma jistax ikollok viżjoni ekonomika b’saħħita mingħar sigurta’ fil-pajjiż, għax l-ebda investitur serju mhu se jinvesti jekk ma jkunx hawn is-sigurta’.
Huwa tkellem fuq il-proposta tal-PN tal-Community Policing, li l-Gvern l-ewwel injora u imbagħad introduċa, proposta li qed tħalli l-frott u li għandha tiġi ntrodotta kullimkien mill-aktar fis. Dwar il-ħolqien ta’ setturi ekonomiċi, Noel Muscat qal li huwa maghruf li sas-sena 2030, 80% tax-xogħol li se jinħoloq ma jeżistix illum u għalhekk għandna ninvestu fl-edukazzjoni u t-taħriġ taż-żgħażagħ u tal-ħaddiema tagħna għall-ħiliet meħtieġa fil-futur. Innota li t-taħriġ u l-edukazzjoni mhux jingħataw il-prijorita’ meħtieġa mill-Gvern Laburista.
Mark Anthony Sammut qal li l-Gvern falla milli joħloq setturi ġodda li jagħmlu l-ekonomija aktar reżiljenti u joħolqu opportunitajiet ġodda ta’ impjiegi ta’ kwalita’. Il-Gvern ħoloq biss industrija waħda: l-bejgħ tal-passaporti, li għamlet ħsara kbira lir-reputazzjoni u naffret investiment ta’ kwalita’. Huwa qal li bl-aġir tiegħu, l-Gvern qed jipperikola industriji ta’ suċċess li kien ħoloq il-PN. L-aġir ta’ Robert Abela li ddefenda lis-CEO tal-MFSA Joe Cuschieri turi li l-Labour ma tgħallem xejn minn dak li għaddiena minnu fl-aħħar snin.
Robert Abela qed juri li pajjiżna għadu maħtuf mill-istess klikka li għamlet għajb lil pajjiżna, u li biex tiddefendi u tgħatti l-ħażin ta’ ftit individwi qed tkompli tipperikola l-futur tagħna u ta’ uliedna. Mark Anthony Sammut qal li qed jinħass il-bżonn ta’ Gvern ġdid, li jagħti tama ġdida lil pajjiżna, b’politika serja li tħares l-interess nazzjonali u l-ġid komuni.
Ivan Castillo qal li dan huwa żmien iebes għall-ħaddiema u rridu noħolqu soluzzjonijiet għad-diffikultajiet minflok nagħtu tama falza. Nippjanaw setturi ġodda ta’ impjieg b’valur miżjud, iżjed pagi tajbin, setturi ġodda innovattivi, ninvestu fil-kapaċitajiet kif wkoll nibnu ekonomija li tkun COVID-resilient sabiex ma jitkissirx kollox mal-ewwel mewġa. Hekk ġara bil-mudell ekonomiku tal-Gvern li għażel ic-cheap labour u fejn l-immigrazzjoni intużat biex tbaxxi l-pagi tal-ħaddiema Maltin, minflok immigrazzjoni li żżid il-valur tal-pagi u li ssaħħaħ il-ħiliet fl-ekonomija.
Ivan Castillo spjega il-proposta ta’ Patt Soċjali Ġdid, fejn il-PN se jagħti priorita’ għall-introduzzjoni tal-living income. Nirrevedu l-mekkaniżmu tal-COLA, noħolqu ġid nadif u nerġgħu naraw l-attractiveness index jerġa’ jogħla.
//= $special ?>