Il-midfielder Kolombjan ta’ Santa Lucia, Kevin Ante Rosario hu r-rebbieħ tal-isbaħ gowl tax-xahar għal Settembru, tal-programm Replay u ġentilment sponsorjat minn dan l-istaġun minn TESCOMA, wieħed mill-isponsors tal-programmi Replay fuq Net Television.
https://www.facebook.com/ReplayNetTelevision/videos/386212729173015
Dan l-unur jingħata esklussivament kull xahar minn Replay, u fl-aħħar snin dejjem kiber fil-popolarità, bil-votazzjoni ssir mill-pubbliku sportiv u telespettaturi ta’ Replay, permezz ta’ sistema ta’ votazzjoni online. Rosero, li dan l-istaġun qed jilgħab it-tieni staġun tiegħu f’Malta u ma’ Santa Lucia fil-Kampjonat Premier, rebaħ dan l-unur permezz ta’ wieħed miż-żewġ gowls li hu skorja fil-partita ta’ nhar id-19 ta’ Settembru li għadda kontra Żejtun Corinthians u li ntemmet fi dro ta’ 2-2.
Dan l-istaġun Rosero qed ikun wieħed tajjeb għaliħ tant li diġa’ skorja xejn inqas minn sitt gowls fl-ewwel seba’ partiti tal-Kampjonat. Għal din il-votazzjoni sabiex jintgħażel l-ewwel rebbieħ tal-isbaħ gowl tax-xahar għal Settembru sponsorjat minn TESCOMA, kien hemm aktar minn 4,000 vot u Rosero kiseb madwar 33 fil-mija tal-voti. Hu rebaħ il-kompetizzjoni diretta ta’ żewġ plejers oħra li l-gowls tagħhom kienu t-tieni u t-tielet l-aktar popolari għax-xahar ta’ Settembru. Dawn huma Erjon Beu ta’ Lija Athletic u Enzo Ruiz ta’ Floriana.
Il-presentazzjoni lil Rosero se ssir din il-ġimgħa u nhar il-Ġimgħa li ġej, fil-programm Replay Preview li jixxandar fid-9:30pm fuq Net Television, se tkun qed jixxandar servizz speċjali b’intervista mal-plejer, dwar ir-rebħ ta’ dan l-unur.
