Il-plejer Maltija tal-bowling Sara Xuereb mistennija tibda esperjenza ġdida wara li rċiviet iċ-ċans li tkompli l-karriera tagħha f’dan l-isport fl-Istati Uniti.
Xuereb irċiviet scholarship mingħand Savannah College of Art and Design biex tingħaqad mat-tim tal-bowling ġewwa Atlanta, Georgia.
Għal diversi snin, Xuereb kienet maħsuba bħala s-suċċessura tal-aqwa bowler femmenili ta’ Malta Sue Abela, li ilha tiddomina x-xena lokali għal dawn l-aħħar erba’ deċenji.
Xuereb, li għandha 19-il sena, rebħet diversi suċċessi f’dawn l-aħħar għaxar snin, fosthom il-medalja tad-deheb fil-Mediterranean Bowling Championships kif ukoll fis-Small Nations Cup, fejn saret ukoll l-iżgħar rebbieħa fl-età ta’ 14-il sena.
