L-Armenja, l-Ażerbajġan u r-Russja, fl-aħħar sigħat, iffirmaw ftehim għat-tmiem tal-konflitt militari dwar ir-reġjun polemikuż ta’ Nagorno-Karabakh.
Il-ftehim seħħ wara sitt ġimgħat ta’ battalji ħorox għall-kontroll tar-reġjun bejn il-qawwiet Armeni-etniċi u l-Ażeri – iżda l-Armenja xejn mhi kuntentata bl-aħħar żviluppi fejn jidher li ‘se jkollha tibqa’ bit-telf li ġarrbet waqt il-ġlied’.
Fil-fatt, il-Prim Ministru tal-Armenja, Nikol Pashinyan, fisser il-ftehim inkwistjoni bħala ‘wieħed li jweġġa lilu u lill-poplu Armen’ – b’diversi osservaturi jaqblu li l-ftehim kapaċi jitqies bħala ‘rebħa għall-Ażerbajġan u telfa għall-Armeni’.
Ir-reġjun ta’ Nagorno-Karabakh hu rikonoxxut bħala parti mill-Ażerbajġan fuq livell internazzjonali, għalkemm hu minnu li l-istess reġjun ilu mill-1994 jitmexxa mill-Armeni-etniċi.
Sadanittant, l-aħħar fażi tal-ġlied għall-kontroll tar-reġjun ġiet konkluża bi ftehim għall-paċi ffirmat mill-President tar-Russja, Vladimir Putin; il-President tal-Ażerbajġan, Ilham Aliyev u l-Prim Ministru Armen Pashinyan.
Il-ftehim jippermetti biex l-Ażerbajġan iżomm iz-zoni ta’ Nagorno-Karabakh li kien ħataf waqt il-konflitt. Intant, l-Armenja qablet ukoll biex, fil-ġimgħat li ġejjin, tirtira minn diversi zoni biswit it-territorji li waqgħu f’idejn l-Ażeri.
Il-ftehim għall-waqfien mill-ġlied, fl-istess ħin, qanqal rabja kbira fl-Armenja, b’numru ta’ dimostranti jassedjaw il-Parlament f’Yerevan fejn sawwtu lill-Ispeaker tal-kamra u ‘vandalizzaw’ l-uffiċċju tal-Prim Ministru.
Min-naħa tiegħu, il-President Putin qal li t-truppi Russi għaż-żamma tal-paċi se jkunu stazzjonati fl-artijiet li sa ftit ilu kienu stabbiliti bħala zona ta’ gwerra bejn l-Armeni-etniċi u l-Ażerbajġan.
